საქართველოს ადვოკატთა ასოციაციის თავმჯდომარე დავით ასათიანი, ნელი დოროყაშვილის ადვოკატის, ანა აბაშიძის მიმართ მეზობლების მხრიდან პომიდვრების სროლას სოციალურ ქსელში ეხმაურება.
როგორც ასათიანი აღნიშნავს, ადვოკატები ასრულებენ პროფესიულ მოვალეობებს და მათი გაიგივება სამართალწარმოების მხარეებთან დაუშვებელია.
„სამწუხაროა, რომ მრავალჯერ გვიწევს ერთი და იგივეს გამეორება: ადვოკატები ასრულებენ თავიანთ პროფესიულ მოვალეობებს და მათი გაიგივება სამართალწარმოების მხარეებთან/კლიენტებთან დაუშვებელია!!!!
აქვე, უფასო რჩევა ზოგიერთ თავქარიანს - ადვოკატების მიმართ აგრესია, სიძულვილის ენა, ხილი თუ ბოსტნეული შეინახეთ პირადი მოხმარებისათვის.
სხვათა შორის, ადვოკატის საქმიანობაში ჩარევა და ამ პროცესში მისთვის ხელის შეშლა ისჯება კანონით“,-წერს დავით ასათიანი სოციალურ ქსელში.
ცნობისთვის, ნელი დოროყაშვილის ინტერესების დამცველის, ანა აბაშიძის თქმით, გუშინ გამართული პრესკონფერენციის შემდეგ მეზობლებმა ეზოში პომიდვრები ესროლეს.