აშშ-ის პრეზიდენტი დონალდ ტრამპი სოციალურ ქსელ „ტვიტერს“ 2020 წლის საპრეზიდენტო არჩევნებში ჩარევასა და თავისუფალი სიტყვის შეზღუდვაში ადანაშაულებს.
„ტვიტერი“ 2020 წლის საპრეზიდენტო არჩევნებში ერევა. მათი თქმით, ჩემი განცხადებები იმის შესახებ, რომ ფოსტის საშუალებით ხმის მიცემა მასობრივი კორუფციისა და გაყალბების მიზეზი გახდება, არასწორია. „ტვიტერი“ სრულად ახშობს თავისუფალ სიტყვას და მე, როგორც პრეზიდენტი, ამას არ დავუშვებ,“- წერს ტრამპი „ტვიტერში“.
ტრამპის მტკიცებით, „ტვიტერის“ გადაწყვეტილება “სიენენის“ და „ვაშინგტონ პოსტისა“ მიერ გავრცელებულ „ფეიკ ინფორმაციას“ ეფუძნება.
ცნობისთვის, „ტვიტერმა“ განაცხადა, რომ აშშ-ის პრეზიდენტის ორმა პოსტმა, სადაც ფოსტის საშუალებით ხმის მიცემაზეა საუბარი, შესაძლოა საზოგადოება შეცდომაში შეიყვანოს. მოგვიანებით, პრეზიდენტის აღნიშნული პოსტები გამაფრთხილებელი ნიშნებით მოინიშნა, რაც ინფორმაციის არასარწმუნოებაზე მიუთითებს.