ფრაქცია "დამოუკიდებელი დეპუტატების" წევრის ლევან გოგიჩაიშვილის განცხადებით, პრემიერ-მინისტრს დღევანდელ პლენარულ სხდომაზე არამხოლოდ კორონავირუსის მართვაზე, არამედ პოლიტიკურ და ეკონომიკურ საკითხებზეც მოუწევს საუბარი.

"ჩვენ არ შემოვიფარგლებით კონკრეტულად ერთი საკითხით. ჩვენთვის მნიშვნელოვანია, რა იყო გუშინ, რა არის დღეს და რა იქნება ხვალ. ამიტომ ვფიქრობ, პრემიერ-მინისტრს მოუწევს სხვა კითხვებზეც პასუხის გაცემა, რაც ეხება პოლიტიკას, ეკონომიკას, მათ უხერხემლო და უსუსტეს გადაწყვეტილებას ბიუჯეტის ქურდის ციხიდან გამოშვების თაობაზე. ამით დაასამარეს ქვეყანაში სამართლიანობის აღდგენა. ამიტომ მათ მოუწევთ ძალიან ბევრ კითხვებზე პასუხის გაცემა. მათ უნდა უპასუხონ იმ ადამიანების კითხვებს, ვისთვისაც მნიშვნელოვანია ხვალინდელი დღე, ხვალინდელი ყოფა, ჩვენი მომავალი და ჩვენი პოლიტიკური ცხოვრება,"- განაცხადა გოგიჩაიშვილმა.