პანდემიამ ყველა გამოწვევების წინაშე დააყენა და ყველას ძლიერი და სუსტი მხარეები გამოავლინა ,- ამის შესახებ საქართველოს პრეზიდენტმა, სალომე ზურაბიშვილმა გაეროს უმაღლესი დონის ონლაინკონფერენციაში მონაწილეობისას განაცხადა, რომელიც Covid 19 -ის პანდემიისა და პანდემიის შემდგომი პერიოდის გლობალური განვითარების დაფინანსების მექანიზმებს მიეძღვნა.

„ჩვენ გვჭირდება მეტი მულტილატერალიზმი და არა ნაკლები, რადგან საზღვრების გარეშე კატაკლიზმების დამარცხება მხოლოდ შესაძლებელია საზღვრებს გარეშე სოლიდარობით. გაერო უნდა იყოს წამყვანი ძალა მულტილატერალიზმის განახლების საქმეში“, - განაცხადა ზურაბიშვილმა.

პრეზიდენტის მოსაზრებით, ამასთან, საჭიროა მეტი რეგიონალური სოლიდარობა. პრეზიდენტის თქმით, მულტილატერალურმა დახმარებამ უნდა მოძებნოს ახალი ინსტრუმენტები, რათა დაეხმაროს გლობალურ ეკონომიკას, ისევე როგორც განვითარებად ეკონომიკებს. პრეზიდენტი მიიჩნევს, რომ ახალი და ყოვლისმომცველი მიდგომებია საჭირო სესხებთან დაკავშირებით.

„გლობალური დახმარების იდეა, ახალი მარშალის გეგმა უნდა იქნას შესწავლილი და მხარდაჭერილი. განსაკუთრებული პერიოდი განსაკუთრებულ რეაგირებას იმსახურებს. მდგრადი განვითარება ხვალის არჩევანი აღარ არის. მდგრადი განვითარების მიზნები ამჟამინდელი აუცილებლობაა“, - აღნიშნა ზურაბიშვილმა.