აშშ-ის პრეზიდენტი დონალდ ტრამპი მინეაპოლისში მიმდინარე საპროტესტო აქციის მონაწილეებს „ავაზაკებს“ უწოდებს.
პრეზიდენტ ტრამპის თქმით, ის განზე ვერ გადგება და უყურებს, რა ხდება ამერიკის დიდ ქალაქში.
„ეს ავაზაკები ჯორჯ ფლოდის ხსოვნას შეურაცხყოფენ. მე ამას არ დავუშვებ, როდესაც ძარცვა-გლეჯა იწყება, სროლაც იწყება,“ - წერს აშშ-ის პრეზიდენტი სოციალურ ქსელ „ტვიტერში“.
„ბიბისის“ ინფორმაციით, რამდენიმედღიანი მასშტაბური საპროტესტო აქციების შემდეგ მინეაპოლისში აშშ-ის ეროვნული თავდაცვის ძალებია მობილიზებული. გამოცემის ცნობით, მინესოტას შტატის გუბერნატორმა ტიმ ვალცმა აღნიშნული გადაწყვეტილება მას შემდეგ მიიღო, რაც საპროტესტო აქციები უკონტროლო გახდა და მომიტინგეებმა შენობები დაწვეს.
შეგახსენებთ, აშშ-ში უკვე მესამე დღეა საპროტესტო აქცია გრძელდება. 46 წლის ჯორჯ ფლოდის დაკავების ვიდეომ აშშ-ის მოსახლეობაში პროტესტი გამოიწვია. კადრებში ჩანს, რომ ხელშეკრულ მამაკაცს პოლიციელი მუხლს კისერზე აჭერს, ისმის დაკავებულის სიტყვებიც, რომ სუნთქვა აღარ შეუძლია. მოგვიანებით, ფლოიდი საავადმყოფოში გარდაიცვალა. ვიდეოს გავრცელების შემდეგ საპროტესტო აქციები შტატების სულ მცირე სამ ქალაქში მიმდინარეობს. მინეაპოლისში, სადაც შემთხვევა მოხდა, მომიტინგეები პოლიციას დაუპირისპირდნენ, შენობებში შეიჭრნენ და რამდენიმე გადაწვეს. პოლიციამ საპასუხოდ ცრემლსადენი გაზი გამოიყენა.