იუსტიციის უმაღლესი საბჭოს არამოსამართლე წევრის, ნაზი ჯანეზაშვილის განცხადებით, უზენაესი სასამართლოს პლენუმის გადაწყვეტილებით, ვასილ როინიშვილის საკონსტიტუციო სასამართლოს მოსამართლის თანამდებობაზე დანიშვნის თაობაზე, ე.წ. კლანის გავლენები საკონსტიტუციო სასამართლოში გაიზარდა.
მისი თქმით, ვასილ როინიშვილი მოსამართლეთა გავლენიანი ჯგუფის მხარდაჭერით რომ არ სარგებლობდეს, ის ასეთ მნიშვნელოვან თანამდებობას ვერ დაიკავებდა.
„საინტერესოა ორი გარემოება, რაც ე.წ. კლანის მხრიდან მასთან მიმართებაში არსებულ ნდობაზე მიუთითებს.
2019 წლის დეკემბერში ვასილ როინიშვილს უზენაესი სასამართლოს მოსამართლის 10-წლიანი ვადა ეწურებოდა. მიუხედავად ამისა, ვადის ამოწურვამდე რამდენიმე დღით ადრე იუსტიციის უმაღლესმა საბჭომ ვასილ როინიშვილს სამოსამართლო უფლებამოსილების ვადა გაუგრძელა, მისი მონაწილეობით დაწყებული საქმეებზე საბოლოო გადაწყვეტილების გამოტანამდე. როინიშვილს იმ მომენტისათვის წარმოებაში ჰქონდა 527 საქმე. ამის შემდეგ საქართველოს პარლამენტმა 14 მოსამართლე აირჩია უზენაეს სასამართლოში. რაც იმას ნიშნავს, რომ ეს საქმეები სხვა მოსამართლეებზე გადანაწილებას დაექვემდებარა და ვასილ როინიშვილს დატვირთულობის შემცირების შესაძლებლობა გაუჩნდა. თუმცა, დეკემბრიდან მოყოლებული, 5 თვის განმავლობაში ის ისე ახორციელებდა უზენაესი სასამართლოს მოსამართლის უფლებამოსილებას, რომ იუსტიციის უმაღლეს საბჭოს არც კი განუხილავს ეს საკითხი და არ დაუსვამს მთავარი კითხვა, ადგილი ხომ არ ჰქონდა საქმეების განხილვის ხელოვნურად გაჭიანურებას“, - განაცხადა ნაზი ჯანეზაშვილმა.
შეგახსენებთ, უზენაესი სასამართლოს პლენუმმა ხმათა უმრავლესობით საკონსტიტუციო სასამართლოს წევრად ვასილ როინიშვილის კანდიდატურა აირჩია.