საქართველოს პარლამენტის დეპუტატი დავით ჭიჭინაძე 2020 წლის საარჩევნო სისტემის ცვლილებების შესახებ საკონსტიტუციო კანონპროექტის მხარდაჭერას არ აპირებს.

როგორც ჭიჭინაძემ პარლამენტში ჟურნალისტებს განუცხადა, საკონსტიტუციო ცვლილებების განხილვაში მონაწილეობას მიიღებს, სადაც საკუთარ პოზიციას დააფიქსირებს, თუ რატომ არ უჭერს მხარს კანონპროექტს.

"მე აბსოლუტურად სხვა იდეოლოგიური მოსაზრებით არ ვაპირებ, მხარი დავუჭირო ცვლილებებს. ვფიქრობ, რომ დღეს ქვეყანაში არათუ ეს საკონსტიტუციო ცვლილებები, არამედ რაზეც ვსაუბრობთ, ხალხის სიდუხჭირეზე, სიღატაკეზეა აქცენტები გადასატანი. არ ვაპირებ მხარდაჭერას, არც ვაპირებდი იმ თავიდანვე, როგორც კი ჩავარდა. არ მგონია, რომ რაღაც კომპრომისული ვარიანტი უნდა მოხდეს. როდესაც მთავრობა ხალხს ატყუებს, იქ კომპრომისის ადგილი არ არის. განხილვებში ვიტყვი, ჩემს აზრს დავაფიქსირებ, თუ რატომ არ ვუჭერ მხარს და შესაბამისად, რა აზრი გამაჩნია, ზოგადად, ასეთ კონსესუსებზე და ასეთ კულუარულ გარიგებებზე", - განაცხადა ჭიჭინაძემ.