ზურაბ აბაშიძე - არ მაქვს სურვილი ვარკვიო, რატომ და რისთვის შემოინახა 5 წელი გულში გიორგი ვაშაძემ ჩემი კომენტარი, რომელიც 2015 წელს გავაკეთე, ეტყობა რაღაც გაუჭირდა

პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე “ახალი საქართველოს” ლიდერის გიორგი ვაშაძის გუშინდელ განცხადებას ეხმაურება და განმარტავს, რომ მან რუსული კომპანიების ქართული პორტებით დაინტერესების საკითხზე კომენტარი 2015 წლის 29 მაისს გააკეთა. მისი შეფასებით, თავის დაგვიანებულ განცხადებაში გიორგი ვაშაძემ კოლაბორაციონიზმად მონათლა რუსეთიდან ტრანზიტული და კომერციული ტვირთების გატარება.

ზურაბ აბაშიძე გიორგი ვაშაძეს საპასუხო განცხადებით ეხმაურება და მას რამდენიმე შეკითხვით მიმართავს.

“გუშინ “ინტერპრესნიუსმა” გაავრცელა ბატონ გიორგი ვაშაძის განცხადება, რომელმაც გამაკრიტიკა ჩემი კომენტარის გამო იმის თაობაზე, რომ რუსული კომპანიები დაინტერესდნენ ქართული პორტებით, თავისი ტვირთების გასატარებლად. არ მაქვს სურვილი ვარკვიო, თუ რატომ და რისთვის შემოინახა 5 წელი გულში ბატონმა ვაშაძემ ჩემი ეს კომენტარი, რომელიც გავაკეთე 2015 წლის 29 მაისს. ეტყობა რაღაც გაუჭირდა. თავის ეგზომ დაგვიანებულ განცხადებაში ბატონმა ვაშაძემ კოლაბორაციონიზმად მონათლა რუსეთიდან ტრანზიტული და კომერციული ტვირთების გატარება. ამასთან დაკავშირებით მასთან მაქვს რამდენიმე კითხვა:

- თვლის თუ არა იგი კოლაბორაციონიზმად რუსეთისთვის ჩვენი ქვეყნის ტერიტორიის 20%-ის ფაქტობრივად გადაფორმებას, რაც „ნაციონალური მოძრაობის“ ხელისუფლებაში ყოფნის დროს მოხდა?

- თვლის თუ არა იგი კოლაბორაციონიზმად საქართველოში რუსეთის სამხედრო ბაზების დაბრუნებას, რაც „ნაციონალური მოძრაობის“ ხელისუფლებაში ყოფნის დროს მოხდა?

- თვლის თუ არა იგი კოლაბორაციონიზმად რუსული კომპანიებისათვის საქართველოს სტრატეგიული ობიექტების, მათ შორის 15 (!) ელექტროსადგურის მიყიდვას, რაც „ნაციონალური მოძრაობის“ ხელისუფლებაში ყოფნის დროს მოხდა? დამატებით კითხვებს ნაცმოძრაობის შესაძლო კოლაბორაციონიზმთან დაკავშირებით იმ შემთხვევისთვის შემოვინახავ, თუკი ბატონი ვაშაძე კვლავაც დროულად ჩათვლის მის განცხადებას 2015 წლის ჩემს კომენტართან დაკავშირებით.

სხვათა შორის, მან ჩემი დიპლომატიური გამოცდილებაც მოიხსენია, რისთვისაც მადლობას მოვახსენებ. ასეთ რჩევას მივცემდი ბატონ ვაშაძეს: თუ საპასუხო კომენტარის გაკეთებას გადაწყვეტთ, ნუ იჩქარებთ, 5 წელი იფიქრეთ და მერე თქვით სათქმელი“,-აღნიშნავს ზურაბ აბაშიძე, რომლის განცხადებასაც საქართველოს მთავრობის ადმინისტრაციის პრესსამსახური ავრცელებს.

ცნობისთვის, “ახალი საქართველოს” ლიდერის გიორგი ვაშაძის განცხადებით, კოლაბორაციონისტულია ზურაბ აბაშიძის განცხადება, რომ რუსული კომპანიების მიერ პორტებით დაინტერესება საინტერესო პერსპექტივაა. მისი თქმით, ეს ქართული სახელმწიფოს ინტერესს არ ემსახურება.

გიორგი ანთაძე - საქართველო ვაშინგტონისა და თავისუფალი სამყაროს მთავარი სტრატეგიული პარტნიორია სამხრეთ კავკასიაში და ჩვენ ეს როლი და ფუნქცია ბოლომდე უნდა ავითვისოთ
ქართული პრესის მიმოხილვა 25.01.2021
ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
სადაზღვევო კომპანია "ევროინს ჯორჯიას" დამფუძნებელი კომპანია Eurohold, ბულგარეთში ელექტროენერგიის უდიდესი მომწოდებელი კომპანიის მფლობელი გახდა
სილქფესტი მომხმარებლებს უქმეებზე ულიმიტო ინტერნეტ და უსასრულო სასაუბრო პაკეტების გააქტიურებას სთავაზობს