ტანზანიის პრეზიდენტმა ჯონ მაგუფულმა ქვეყანა „კორონავირუსისგან გათავისუფლებულად“ გამოაცხადა.

„მსურს, ტანზანიელებს მადლობა გადავუხადო. ჩვენ ვლოცულობდით, რომ დავეცავით პანდემიისგან და ღმერთმა გვიპასუხა ჩვენ. დარწმუნებული ვარ, რომ კორონავირუსის დაავადება ღმერთმა ამოძირკვა“, - განაცხადა ჯონ მაგუფულმა.

აღსანიშნავია, რომ მსგავსი განცხადება მან რამდენიმე დღის წინ მასწავლებლების კონფერენციაზეც გააკეთა და ასევე საზოგადოებას მოუწოდა, რომ უარი თქვან დონორების მიერ ნაჩუქარ პირბადეებზე.

„სიფრთხილე უნდა გამოვიჩინოთ. დონორების მიერ ნაჩუქარმა პირბადეებმა, შესაძლოა, ვირუსის გავრცელება გამოიწვიოს. მინდა, ტანზანიელებს მოგიწოდოთ, არ მიიღოთ ეს პირბადეები და დონორებს გადაეცით, საკუთარი ცოლებისა და ბავშვებისთვის გამოიყენონ,“- განაცხადა ტანზანიის პრეზიდენტმა.

ტანზანიამ კორონავირუსთან დაკავშირებით ქვეყანაში არსებული სიტუაციის შესახებ ინფორმაცია ბოლოს 29 აპრილს გაავრცელა. მათი ინფორმაციით, ტანზანიაში კორონავირუსის 508 შემთხვევაა დადასტურებული და დაღუპულია 21 ადამიანი.