თუ დილით არის ერთიანი ეროვნული გამოცდების ხანგრძლივი სესია, მეორე სესია იმ დღეს აღარ იქნება. დღეში ორი სესია იქნება მხოლოდ იმ შემთხვევაში, თუ ხანმოკლე სესიებია, - ამის შესახებ შეფასებისა და გამოცდების ეროვნული ცენტრის ხელმძღვანელმა სოფო გორგოძემ განაცხადა. მისივე თქმით, ამ გადაწყვეტილების შედეგად, საგამოცდო ოთახების მოწესრიგება შესაძლებელი იქნება.
„როგორც იცით ზოგიერთი გამოცდა უფრო ხანგრძლივია, ზოგიერთი 2.5 საათში მთავრდება. თუ დილით არის ხანგრძლივი სესია, მეორე სესია იმ დღეს აღარ იქნება. დღეში ორი სესია იქნება მხოლოდ იმ შემთხვევაში, თუ ხანმოკლე სესიებია. ეს იმის საშუალებას მოგვცემს, რომ ჩვენ შეგეძლება კონდიცირება ვუზრუნველყოთ სესიებს შორის. ამიტომ ვეცდებით რომ რაღაც პერიოდი გავანიავოთ ოთახები და 2 საათი მაინც გვქონდეს იმისთვის, რომ გავაგრილოთ, ვიდრე მეორე ნაკადი შემოვა. ამიტომ ეს დამოკიდებული იქნება სესიების ხანგრძლივობაზე,“ - განაცხადა გორგოძემ.