ესპანეთის ჯანდაცვის მინისტრის განცხადებით, 21 ივნისს ქვეყანაში საგანგებო მდგომარეობის დასრულების შემდეგაც ძალაში დარჩება კორონავირუსთან ბრძოლის ფარგლებში დაწესებული ეფექტური ზომები, ვიდრე ვირუსი საბოლოოდ არ დამარცხდება.

სალვადორ ილლამ განსაკუთრებით ხაზი გაუსვა 1.5 მეტრიანი სოციალური დისტანციის დაცვისა და პირბადეების ტარების აუცილებლობას.

„პირბადეების ტარების ვალდებულება ძალაში დარჩება, ვიდრე საბოლოოდ არ დავამარცხებთ ვირუსს. ეს კი მაშინ მოხდება, როცა ქმედითი მკურნალობის გზა ან ეფექტური ვაქცინა გვექნება“, - აღნიშნა ესპანეთის ჯანდაცვის მინისტრმა.

სამი კვირის წინ ესპანეთმა პირბადეების ტარება სავალდებულო გახადა ყველა საჯარო სივრცეში, სადაც ადეკვატური სოციალური დისტანციის დაცვა ვერ ხერხდება. რეგულაცია 6 წელზე ზემოთ ასაკის ყველა მოქალაქეს ეხება.

ესპანეთში კორონავირუსის გამო დაწესებული შეზღუდვების უმეტესობა 21 ივნისს მოიხსნება, როცა ქვეყანაში საგანგებო მდგომარეობა საბოლოოდ დასრულდება.