ენერგოომბუდსმენი ბათუმში, ”თევზის კაფეში" მომხდარ ინციდენტს შეისწავლის,- ამის შესახებ „ინტერპრესნიუსს“ ენერგოომბუდსმენის აპარატიდან აცნობეს.

„მასობრივი ინფორმაციის საშუალებებით ცნობილი გახდა, რომ ქალაქ ბათუმში, თევზის ბაზრის ტერიტორიაზე არსებულ "თევზის კაფეში" ბუნებრივი გაზის გაჟონვამ აფეთქება გამოიწვია. ენერგოომბუდსმენის აპარატმა ახსნა-განმარტებისთვის უკვე მიმართა შპს „სოკარ ჯორჯია გაზს“, ხოლო დეტალებს ადგილზე მოიკვლევს სამსახურის წარმომადგენელი. მნიშვნელოვანია იმის გარკვევა, რამდენად აკმაყოფილებდა შიდა ქსელი არსებულ სტანდარტებს, განახორციელა თუ არა მომსახურე კომპანიამ გეგმური მონიტორინგი და ხომ არ არსებობდა რაიმე სახის რეკომენდაციები უსაფრთხოების გაუმჯობესების კუთხით. შეგახსენებთ, რომ მომხმარებელთა უსაფრთხოების დაცვის და ბუნებრივი გაზის უსაფრთხო მოხმარების შესახებ ცნობიერების ამაღლების მიზნით, საზოგადოებრივი დამცველის სამსახური ახორციელებს კამპანიას ,,გაუფრთხილდი სიცოცხლეს". ეს არის სამსახურის საქმიანობის ერთ-ერთი პრიორიტეტული მიმართულება,”-ნათქვამია ინფორმაციაში.