კახა კალაძე 20 ივნისის აქციაზე - არსებული კანონით, მერიას არავითარი შესაძლებლობა არ აქვს, რომ ვინმეს დართოს ან აუკრძალოს აქციის გამართვა

თბილისის მერის კახა კალაძის განცხადებით, მათ არ აქვთ იმის უფლებამოსილება, რომ ვინმეს აქციის გამართვის უფლება მისცენ ან აუკრძალონ. ამ განცხადებით ის 20 ივნისს, რუსთაველის გამზირზე დაგეგმილ აქციას გამოეხმაურა და აღნიშნა, რომ ადამიანებს საკუთარი მოსაზრებების გამოხატვის შესაძლებლობა აქვთ.

„მინდა ყველამ გაიგოს, რომ დედაქალაქის მერიას არსებული კანონის გათვალისწინებით, არავითარი შესაძლებლობა არ აქვს, რომ ვინმეს დართოს ან აუკრძალოს აქციის გამართვა. ჩვენ არ გვაქვს ამის უფლებამოსილება და ვერავის ავუკრძალავთ. მათი უფლებაა, კონკრეტულ ლოკაციაზე ჩაატარონ აქცია, სადაც მოითხოვენ. თუ კონკრეტულ ტერიტორიაზე, მუნიციპალიტეტს, სახელმწიფოს სხვადასხვა უწყებებს და ადამიანთა ჯგუფებს შემოტანილი აქვს კონკრეტულ ტერიტორიაზე სხვადასხვა ღონისძიებების გამართვის ნებართვა, მერია უფლებამოსილი და ვალდებულია, ეს იმ მხარეს აცნობოს, რომელსაც კონკრეტულ ადგილთან დაკავშირებით წერილი შემოაქვს“,- განაცხადა კალაძემ.

ის რუსთაველის გამზირზე დაგეგმილ აქციასთან დაკავშირებით პარლამენტის ყოფილი თავმჯდომარის, ირაკლი კობახიძის განხადებასაც გამოეხმაურა, რომელმაც 20 ივნისს დაგეგმილ აქციას "200 ნაციონალის შეკრება" უწოდა.

„რამდენი იქნება, არსებითი მნიშვნელობა არ აქვს, რადგან ამ ქვეყანაში ადამიანებს აქვთ შესაძლებლობა, თავიანთი მოსაზრებები გამოხატონ და მათ ამაში ხელს ვერავინ შეუშლის “,-განაცხადა კალაძემ.

ჟურნალისტის კითხვაზე, ფიქრობს თუ არა ის, რომ ეს „ნაციონალების“ აქცია იქნება და არა იმ აქტივისტების, რომლებიც გასული წლის 20 ივნისს, რუსეთის დუმის წევრის გავრილოვის ვიზიტს აპროტესტებდნენ, კალაძემ უპასუხა, რომ იმ დროს პარლამენტში შეჭრის მცდელობა იყო.

„პარლამენტის წინ ჩვენ ასევე ვხედავდით პოლიტიკურ ლიდერებს, რომლებიც ცდილობდნენ, შეცდომაში შეეყვანათ ახალგაზრდები და პარლამენტში შეჭრას, შევარდნას ცდილობდნენ. ამის აღიარებითი ჩვენებაც არსებობს პირდაპირ სატელევიოზო ეთერში“,-აღნიშნა კალაძემ.

გიორგი ანთაძე - საქართველო ვაშინგტონისა და თავისუფალი სამყაროს მთავარი სტრატეგიული პარტნიორია სამხრეთ კავკასიაში და ჩვენ ეს როლი და ფუნქცია ბოლომდე უნდა ავითვისოთ
ქართული პრესის მიმოხილვა 25.01.2021
ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
სილქფესტი მომხმარებლებს უქმეებზე ულიმიტო ინტერნეტ და უსასრულო სასაუბრო პაკეტების გააქტიურებას სთავაზობს