ევროკომისიამ დღეს შენგენის წევრსა და ასოცირებულ სახელმწიფოებს რეკომენდაციით მიმართა, გარე საზღვრებზე დაწესებული შეზღუდვები 1-ელი ივლისიდან ეტაპობრივად, გარკვეული კრიტერიუმების გათვალისწინებით მოხსნან, - ამის შესახებ ევროკომისიის განცხადებაშია ნათქვამი.
რეკომენდაციებში აღნიშნულია, რომ სამგზავრო შეზღუდვები უნდა მოიხსნას იმ ქვეყნებში, რომლებსაც წევრი სახელმწიფოები ერთობლივად შეარჩევენ დადგენილი ობიექტური კრიტერიუმების საფუძველზე. ეს კრიტერიუმები მოიცავს ამა თუ იმ ქვეყნის ჯანდაცვის სისტემაში არსებულ მდგომარეობას, მოგზაურობის დროს ვირუსის გავრცელების შესაჩერებელი ზომების გამოყენების შესაძლებლობასა და ისეთი წყაროების მონაცემების გათვალისწინებას, როგორიცაა დაავადების კონტროლისა და პრევენციის ევროპული ცენტრი და ჯანდაცვის მსოფლიო ორგანიზაცია.
რეკომენდაციების თანახმად, ამა თუ იმ ქვეყანასთან მიმოსვლაზე შეზღუდვა შესაძლოა, ხელახლა დაწესდეს, თუკი ეს ქვეყანა წარმოდგენილ კრიტერიუმებს მომავალში ვეღარ დააკმაყოფილებს.
ახალი კორონავირუსის პანდემიის გამო, ევროკავშირის არაწევრი ქვეყნების მოქალაქეებისთვის შენგენის ზონაში ჩასვლა ამ ეტაპზე აკრძალულია.