აშშ-ის პრეზიდენტმა დონალდ ტრამპმა ხელი მოაწერა სააღსრულებო განკარგულებას, რომელიც სანქციებისა და დამატებითი სავიზო შეზღუდვების შესაძლებლობას იძლევა სისხლის სამართლის საერთაშორისო სასამართლოს (ICC) წევრებისთვის.
როგორც CNN-ი წერს, აღნიშნული ქმედება წარმოადგენს ამერიკის ადმინისტრაციის მხრიდან მცდელობას, რომ ხელი შეუშალოს ამერიკელი სამხედრო მოსამსახურეებისა და სადაზვერვო მაღალჩინოსნების მიერ სავარაუდოდ ჩადენილი ომის დანაშაულების შესახებ გამოძიებას.
სისხლის სამართლის საერთაშორისო სასამართლომ ავღანეთში ამერიკის შეიარაღებული ძალების, ცენტრალური სადაზვერვო სააგენტოს CIA და "თალიბანის" მიერ შესაძლო ომის დანაშაულის და კაცობრიობის წინაშე ჩადენილი შესაძლო დანაშაულებების შესახებ გამოძიების დაწყებისთვის 5 მარტს სანქცია გასცა.
ტრამპმა სააღსრულებო განკარგულებას, რომელიც მიმართულია ამ გამოძიებაში უშუალოდ მონაწილე პირებისკენ, ხელი დღეს მოაწერა.
„ამერიკელი სამხედრო მოსამსახურეებისა და ჩვენი ეროვნული სუვერენიტეტის დაცვის მტკიცე ვალდებულების ფარგლებში, პრეზიდენტმა დონალდ ტრამპმა ხელი მოაწერა ეკონომიკური სანქციების შესახებ განკარგულებას სისხლის სამართლის საერთაშორისო სასამართლოს თანამდებობის იმ პირების წინააღმდეგ, რომლებიც პირდაპირ არიან ჩართულნი ნებისმიერი სახის ძალისხმევაში, აშშ-ის თანხმობის გარეშე გამოძიება ან სამართლებრივი დევნა აწარმოონ ამერიკელების მიმართ“, - ამის შესახებ თეთრი სახლის პრესსპიკერმა კეილი მაკენანიმ განაცხადა.
მისივე თქმით, პრეზიდენტმა სისხლის სამართლის საერთაშორისო სასამართლოს მაღალჩინოსნებისა და მათი ოჯახის წევრების მიმართ სავიზო შეზღუდვების გაფართოების სანქციაც გასცა.
აშშ სისხლის სამართლის საერთაშორისო სასამართლოს წევრი არ არის.