ივანე ჯავახიშვილის სახელობის თბილისის სახელმწიფო უნივერსიტეტის კანცლერის, ლაშა საღინაძის ინფორმაციით, კორონავირუსით ინფიცირებულ თანამშრომელთან, 2 პირდაპირი და 10 ირიბი კონტაქტის შემთხვევაა დაფიქსირებული და ისინი თვითიზოლაციაში იმყოფებიან. მისივე თქმით, ინფიცირებული თანამშრომლის ჯანმრთელობის მდგომარეობა რთული არ არის, თუმცა მას გარკვეული თანმდევი დაავადებები აღენიშნება.
„დასუფთავების სამსახურის თანამშრომლები კვირაში ერთხელ, მხოლოდ 2-3 საათით გამოდიან სამსახურში თავისი საქმიანობის შესასრულებლად, შესაბამისად კონტაქტების რაოდენობა ძალიან მცირეა. უშუალოდ ინფიცირებული შენობაში 9 დღის წინ იმყოფებოდა. მისი ყველა კონტაქტი გამოკვლეულია, მიწოდებულია შესაბამისი სამსახურებისთვის, ყველასთან ჩატარებულია PCR ტესტირება და ამ ეტაპზე თვითიზოლაციაში იმყოფებიან. პირდაპირი კონტაქტი იყო 2, ირიბი კონტაქტის 10 შემთხვევაა გამოვლენილი და ეს პირებიც თვითიზოლაციაში არიან. ინფიცირებულ ქალს საპენსიო ასაკი აქვს, მისი დაინფიცირების წყარო, როგორც ჩემთვის ცნობილია, დადგენილი არ არის და ამასთან დაკავშირებით დამატებითი კვლევა მიმდინარეობს, მაგრამ დადასტურებით შემიძლია გითხრათ, რომ თსუ-ში წყარო აღმოჩენილი არ არის. ამ ეტაპისთვის მისი ჯანმრთელობის მდგომარეობა რთული არ არის, მაგრამ მას გარკვეული თანმდევი დაავადებები აღენიშნება, შესაბამისად მაინც საყურადღებოა“, - განაცხადა ლაშა საღინაძემ.