რა თქმა უნდა, კონფიდენციალური შეხვედრის შინაარსი ჩვენ არ გვეცოდინება და თუ რაიმე ინტერესი გააჩნია მეუფე იაკობს, კარგი იქნება თუ ის ოპოზიციასაც შეხვდება,- ამის შესახებ ფრაქცია “ნაციონალური მოძრაობის” თავმჯდომარე რომან გოცირიძემ განაცხადა, რითაც გამოეხმაურა არსებულ ინფორმაციას, პარლამენტში მეუფე იაკობისა და პარლამენტის თავმჯდომარის შეხვედრის თაობაზე.
როგორც რომან გოცირიძე ამბობს, საინტერესოა მეუფეს აზრი იმასთან დაკავშირებით, თუ რა პოზიცია აქვს მას გიორგი გახარიას სიის პირველ ნომრად შესაძლო დასახელების შესახებ, მაშინ როცა მას "რუსეთის კაცად " მოიხსენიებდა.
როგორც დეპუტატი აღნიშნავს, პარლამენტში მსგავს შეხვედრებს პოლიტიკური ქვეტექსტი აქვს.
"რა თქმა უნდა, კონფიდენციალური შეხვედრის შინაარსი ჩვენ არ გვეცოდინება და თუ რაიმე ინტერესი გააჩნია მეუფე იაკობს, კარგი იქნება თუ ის ოპოზიციასაც შეხვდება და მოახსენებს იმას, რაც მან ერთხელ უკვე თქვა, რომ ქვეყანაში იგეგმებოდა ფაქტობრივად საეკლესიო გადატრიალება, რომელშიც მონაწილეობდა საქართველოს ხელისუფლების წამყვანი პირები, მათ შორის, გიორგი გახარია და რამდენიმე მინისტრი. ეს საკითხი არ არის დახურული. ეს არის დანაშაული და ეს ადრე თუ გვიან, იქნება გამოძიებული. ბუნებრივია, ჩვენგან პირველი კითხვა იქნებოდა ეს. შეხვედრა პარლამენტში, პარლამენტის თავმჯდომარესთან, რა თქმა უნდა, სიმბოლურია, რადგან ეს არის ყველაზე დიდი პოლიტიკური ორგანო და ყოველთვის ექნება ასეთ შეხვედრებს პოლიტიკური ქვეტექსტები,"- განაცხადა რომან გოცირიძემ.
ცნობისთვის, არსებული ინფორმაციით, მეუფე იაკობი დღეს პარლამენტში იმყოფებოდა და არჩილ თალაკვაძეს შეხვდა.