სურსათის ეროვნული სააგენტოს წარმომადგენლები საზოგადოებრივი კვების ობიექტების საქმიანობის აღდგენასთან დაკავშირებით რესტორნებისა და სასტუმროების ბიზნესის დარგობრივ ასოციაციებს შეხვდნენ და არსებული გამოწვევების ფონზე დადგენილი მოთხოვნები და რეკომენდაციები გააცნეს. ამის შესახებ „ინტერპრესნიუსს“ სურსათის ეროვნული სააგენტოდან აცნობეს.
„სააგენტო არის მუდმივ მზადყოფნაში ითანამშრომლოს ბიზნესსექტორთან. ტურისტული სეზონისთვის უმნიშვნელოვანესია კვების ობიექტების შეუფერხებელი ფუნქციონირება, რაც პირდაპირ კავშირშია ახალი კორონავირუსის პრევენციის მიზნით შემუშავებული უსაფრთხოების წესებისა და სურსათის უვნებლობის სტანდარტების დაცვასთან,“- განაცხადა სურსათის ეროვნული სააგენტოს უფროსის მოადგილემ ვასილ ბასილაძემ.
სურსათის ეროვნული სააგენტოს წარმომადგენლებმა გამოთქვეს მზადყოფნა, საჭიროების შემთხვევაში საკონსულტაციო შეხვედრები გამართონ. ბიზნესასოციაციებმა აღნიშნეს, რომ სექტორი მაქსიმალურად არის მობილიზებული იმისათვის, რომ ყველა მოთხოვნა იყოს გათვალისწინებული. სურსათის ეროვნულ სააგენტოში გამართულ შეხვედრას გასტრონომიული ტურიზმის ბიზნესასოციაციის, რესტორატორთა ასოციაციის, სასტუმროების და რესტორნების ფედერაციის, გასტრონომიის ასოციაციის წარმომადგენლები ესწრებოდნენ.