ნათია თურნავა ელჩებს - ჩვენს თითოეულ წარმატებაში თქვენი დიდი წვლილია

ეკონომიკისა და მდგრადი განვითარების მინისტრმა საქართველოში აკრედიტირებულ ელჩებს მადლობა გადაუხადა საქართველოში პანდემიის შემდგომ ტურისტული სეზონის გახსნის საქმეში გაწეული თანადგომისთვის.

„დადგა ეს სასიხარულო დღე - ჩვენ გავხსენით შიდა ტურიზმი, გავხსენით ეს სეზონი. ვულოცავ სრულიად საქართველოს, გილოცავთ თქვენ იმიტომ, რომ თქვენ ხართ ჩვენი უდიდესი გულშემატკივარი და ჩვენს თითოეულ წარმატებაში თქვენი ძალიან დიდი წვლილია“, - მიმართა ნათია თურნავამ ყვარელში შეკრებილ უცხოელ ელჩებს.

ნათია თურნავამ ტურისტული სეზონის გახსნა ასევე მიულოცა საქართველოს მთავრობას. როგორც მან აღნიშნა, ის ფაქტი, რომ შიდა ტურიზმი დათქმულ დროს, 15 ივნისს გაიხსნა, ნიშნავს, რომ მთვარობამ ყველაფერი სწორად გააკეთა.

„ეს იმას ნიშნავს, რომ ყველაფერი სწორად გავაკეთეთ და ყველაფერი ისე გამოგვივიდა, როგორც ვფიქრობდით და ვგეგმავდით. ეს არის ძალიან დიდი, მუხლჩაუხრელი შრომის შედეგი, ერთობლივი ძალისხმევის შედეგი და ნამდვილად არ ვგულისხმობ მხოლოდ მთავრობას, თუმცა მთავრობა მართლაც 24 საათიან რეჟიმში მუშაობდა, რომ ეს წარმატბული ეტაპი მოსულიყო. ეს არის კერძო სექტორის ძალიან დიდი ჩართულობა და ძალიან დიდი მადლობა ჩვენს ტურისტულ ინდუსტრიას“, - განაცხადა ეკონომიკის მინისტრმა.

ამასთან, ნათია თურნავას განცხადებით, მნიშვნელოვანია, რომ ტურიზმის გახსნა საქართველოს უსაფრთხო დანიშნულების ქვეყნად აღიარების ფონზე მოხდა. მინისტრმა ხაზგასმით აღნიშნა ამ მიმართულებით მუშაობის პროცესში საქართველოში აკრედიტებული ელჩების პოზიტიური როლი.

„ჩვენ ვართ აღიარებული, როგორც უსაფრთხო დანიშნულების ქვეყანა, მწვანე ქვეყანა, სასურველი ქვეყანა ყველა ვიზიტორისთვის და ამაში თქვენი უდიდესი დამსახურებაა იმიტომ, რომ ძალიან აქტიურად გვიდგახართ გვერდში თქვენი ქვეყნების მთავრობებთან ურთიერთობაში - ტურიზმის, ტრანსპორტის, ეკონომიკის, საგარეო საქმეთა მინისტრებთან ჩვენს ყოველდღიურ კომუნიკაციაში. ამას ვგრძნობდით ანტიკრიზისული გეგმის დაგეგმვის და განხორციელების თითოეულ ნაბიჯზე, ამას ვგრძნობდით, მაშინაც, როცა ასე სწრაფად - თქვენი დახმარებით, საერთაშორისო საფინანსო ორგანიზაციების დახმარებით შევძელით საგარეო დახმარების მობილიზება, რომლის გარეშეც ვერც ერთი ცალკე აღებული ქვეყანა ვერ გაუმკლავდება ამ ახალ, აქამდე უცნობ გამოწვევას და ძალიან, ძალიან დიდი მადლობა თქვენ“, - განაცხადა ეკონომიკის მინისტრმა.

აღნიშნულ ინფორმაციას საქართველოს ეკონომიკის სამინისტროს პრესსამსახური ავრცელებს.

კახა გოგოლაშვილი - როცა სტაბილიზაციისკენ მიმართული ნებისმიერი კონსტრუქცია ინგრევა, იქ სამოქალაქო დაპირისპირების საფრთხეც არსებობს
ქართული პრესის მიმოხილვა 29.07.2021
ლევან ალაფიშვილი - ოპოზიციამ მიუტევებელი შეცდომა დაუშვა, როცა პლებისციტი თვითმმართველობის არჩევნებზე მიბმულ პროცენტში გაცვალა
რა უპირატესობები აქვს სამსუნგის სმარტფონს ოფიციალური ჰოლოგრამით?
სიახლე PSP-სგან - ფრანგული დერმატოლოგიური კოსმეტიკის ინოვაციური ბრენდი SVR უკვე საქართველოშია
გაყინული კრემიდან „თოლიას“ რეცეპტებამდე, ანუ ყველაფერი, რაც ნაყინის შესახებ უნდა იცოდე