კომპანიის ინფორმაციით, „საქნახშირში“ სამუშაო პროცესი დღეს აღდგება

„საქნახშირში“ სამუშაო პროცესი დღეს განახლდება. ამის შესახებ „ინტერპრესნიუსს“ კომპანია „საქნახშირიდან“ აცნობეს.

მათივე ინფორმაციით, 16 ივნისს, კომპანია „საქნახშირის“ თანამშრომლებსა და ადმინისტრაციას შორის შეთანხმება შედგა. თავდაპირველად, მეშახტეები ტყიბულის მერიის შენობის წინ შეიკრიბნენ და ხელფასის მომატებას ითხოვდნენ. მოგვიანებით ისინი „საქნახშირის“ დირექტორთა საბჭოს თავმჯდომარეს შეხვდნენ, რის შემდეგაც გადაწყდა, რომ 17 ივნისიდან მინდელისა და ძიძიგურის სახელობის შახტებში სამუშაო პროცესები განახლდება.

როგორც ინფორმაციაშია აღნიშნული, შახტის განვითარება ჯერ კიდევ 2019 წლის ნოემბერში შექმნილი გეგმის მიხედვით წარიმართება, რომლის ძირითად მიმართულებებს ინფრასტრუქტურის შეცვლა, უსაფრთხო სამუშაო გარემოს შექმნა და ანაზღაურების ახალ, ბონუსურ სისტემაზე გადასვლა წარმოადგენს. „სწორედ ამ საკითხების განხილვა მოხდა მეშახტეებსა და „საქნახშირის“ ადმინისტრაციის წარმომადგენლებს შორის. გარდა ამისა, აგვისტოში იგეგმება „საქნახშირის,“ კომპანიის თანამშრომლებისა და პროფკავშირების გაერთიანების სამმხრივი ხელშეკრულების გაფორმება, სადაც დეტალურად იქნება გაწერილი როგორც დამსაქმებლის, ისე დასაქმებულების უფლება-მოვალეობები და მათ შესრულებას პროფკავშირი გააკონტროლებს“, - ნათქვამია ინფორმაციაში.

„ანაზღაურების ახალ სისტემაზე გადასვლა ჯერ კიდევ ნოებრიდან იყო ჩვენი გეგმის ნაწილი. ეს გახლდათ დაგეგმილი პროექტი და ჩვენ ამ გეგმას მივყვებოდით. სამწუხაროდ, მსოფლიო პანდემიის გამო ეს პროექტი გარკვეული პერიოდით შეფერხდა. თუმცა, ახლა კვლავ ვაგრძელებთ გეგმის მიხედვით მუშაობას, შახტის განვითარებაზე და სამუშაო პირობების გაუმჯობესებაზე ზრუნვას. რაც შეეხება გაცდენილი დღეების ანაზღაურების საკითხს, ჩვენი იურისტები ამ თემაზე მუშაობენ და კომპანიის გადაწყვეტილება უახლოეს პერიოდში გახდება ცნობილი“, - განაცხადა საქნახშირის დირექტორთა საბჭოს თავმჯდომარემ, მიხაილ სოცკიმ.

ზაალ ანჯაფარიძე - სტაბილურობა, რომელიც დღეს გვაქვს, საკმაოდ მყიფეა - სახელმწიფოს რესურსები ულევი არ არის და ამიტომ  ხელისუფლება  ცდილობს,  თავი დაიზღვიოს
ქართული პრესის მიმოხილვა 28.01.2021
ბაიდენის პრეზიდენტობის პერიოდის საგარეო პოლიტიკა: ალბათობები და ჩვენი რეალისტური მოლოდინები
ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
სილქფესტი მომხმარებლებს ინტერნეტის და სასაუბრო პაკეტების ოთხ სააქციო პირობას სთავაზობს
JTI-ს საუკეთესო დამსაქმებლის ჯილდო გადაეცა