გიგა ბოკერია - მხოლოდ ტუსკი კი არა, საქართველოს ყველა მეგობარი, პერსონა, ქვეყანა თუ საერთაშორისო ინსტიტუტი, უაღრესად შეშფოთებულია იმით, საითაც წაიყვანა ქვეყანა ივანიშვილმა

„ევროპული საქართველოს“ ერთ-ერთი ლიდერის, გიგა ბოკერიას განცხადებით, არა მხოლოდ ევროპის სახალხო პარტიის თავმჯდომარის დონალდ ტუსკის, არამედ ბევრი სხვა პარტნიორის პრინციპული და პრაგმატული ინტერესია, რომ საქართველო დემოკრატიული და სუვერენული ქვეყანა იყოს. ამის შესახებ ბოკერიამ „ინტერპრესნიუსს“ განუცხადა.

მისი შეფასებით, ვინც ამ ამოცანას საფრთხეს უქმნის, საერთაშორისო საზოგადოების მხრიდან ყოველთვის კრიტიკის ობიექტი ხდება.

„მხოლოდ ბატონი ტუსკი კი არა, რომელიც საქართველოს დიდი ხნის პარტნიორი და მეგობარია, არამედ ზოგადად, საქართველოს ყველა მეგობარი, პერსონა, ქვეყანა თუ საერთაშორისო ინსტიტუტი, უაღრესად შეშფოთებულია იმით, საითაც წაიყვანა ქვეყანა ივანიშვილმა. ამ ჩიხში შეყვანის გამოვლინებაა ის პოლიტიკური კრიზისი, რომელიც მან „გავრილოვის ღამით“, შემდეგ მასზე რეაქციითა და საზოგადოების გადაგდებით შექმნა - არაანგარიშვალდებულებით საზოგადოების წინაშე, მერე პროტესტის საპასუხოდ პოლიტიკური დევნით და სულ ბოლოს, ქართულ საზოგადოებასთან ერთად, საქართველოს მეგობრების მიერ მიღწეული შეთანხმების ჯერჯერობით შეუსრულებლობით. ამიტომ, დონალდ ტუსკის ჩათვლით, ყველა ასეთ ადამიანს აქვს პრინციპული და პრაგმატული ინტერესი, რომ საქართველო დემოკრატიული და სუვერენული ქვეყანა იყოს. მათ კარგად იციან, რომ ასეთია ქართველი ხალხის ნება. ვინც ამ ამოცანას საფრთხეს უქმნის, ბუნებრივია, ის ყოველთვის კრიტიკის ობიექტი ხდება. დღეს ასეთი საფრთხე არის ბიძინა ივანიშვილი და მისი ხელისუფლება“,- განაცხადა ბოკერიამ.

კითხვაზე, მოელის თუ არა „ევროპული საქართველო“ ხელისუფლების მხრიდან 8 მარტის შეთანხმების შესრულებას, გიგა ბოკერიამ განაცხადა, რომ ბიძინა ივანიშვილის შემთხვევაში პროგნოზების გაკეთება რთულია.

„თუ არ შეასრულებს, ეს მხოლოდ მის პერსონალურ პოლიტიკურ ბედს დაამძიმებს. უბრალოდ, ქვეყნისთვის ცუდია, როცა ისეთი გადაწყვეტილებები მიიღება, რომელიც პოლიტიკურ კლიმატს, დემოკრატიულ ტრადიციას აზიანებს და ჩვენნაირი ქვეყნისთვის რისკებს ზრდის “,- განაცხადა ბოკერიამ.

ცნობისთვის, ევროპის სახალხო პარტიის თავმჯდომარე დონალდ ტუსკი გიორგი რურუას პატიმრობაში ყოფნის გამო შეშფოთებას გამოთქვამს და ხელისუფლებას 8 მარტის შეთანხმების სრულად შესრულებისა და რურუას გათავისუფლებისკენ მოუწოდებს. მისი განმარტებით, ევროპის სახალხო პარტია მოელის, რომ საქართველოში მოახლოებული საარჩევნო კამპანია ამომრჩეველთა მოსყიდვის, დაშინების და ადმინისტრაციული რესურსების გამოყენების გარეშე ჩატარდება.

ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
ქართული პრესის მიმოხილვა 22.01.2021
არჩილ მორჩილაძე - ბიუჯეტის ხარჯზე მედიკამენტების ხარჯების ანაზღაურებას სახელმწიფოს მიერ დასაქმებული ადამიანები და მათი ოჯახის წევრები, 250 000-ზე მეტი ადამიანი იღებს, როცა უამრავი სოციალურად დაუცველი ამ დაფარვის მიღმაა დარჩენილი
რა გეგმები აქვს ქუთაისის საერთაშორისო უნივერსიტეტს და რა პროგრამებს სთავაზობს სტუდენტებს? - ინტერვიუ უნივერსიტეტის კანცლერ მაგდა მაღრაძესთან
სილქფესტი მომხმარებლებს უქმეებზე ულიმიტო ინტერნეტ და უსასრულო სასაუბრო პაკეტების გააქტიურებას სთავაზობს
დეველოპერული კომპანია „ბლოქსი“ ქალაქ ზუგდიდში მულტიფუნქციური სავაჭრო ცენტრის მშენებლობას იწყებს
ევროკავშირის და FAO-ს მხარდაჭერით ქართველი ფერმერები შემოსავლებს და წარმოებას ზრდიან