კიევის სასამართლომ უკრაინის ყოფილი პრეზიდენტის, პეტრო პოროშენკოსთვის აღკვეთის ღონისძიების შეფარდებასთან დაკავშირებით სხდომა პირველ ივლისამდე გადადო. შესაბამისი გადაწყვეტილება პეჩერის რაიონულმა სასამართლომ მიიღო.
მანამდე კი, პროკურატურამ აღკვეთის ღონისძიების მოთხოვნა შეცვალა, წინასწარი პატიმრობის ნაცვლად, პირადი თავდებობა მოითხოვა.
თავად პოროშენკომაც პირობა დადო, რომ კიევს ნებართვის გარეშე არ დატოვებს.
პარალელურად, სასამართლოსთან პოროშენკოს მხარდამჭერების აქცია გაიმართა და მას მომხრეები დროშებით შეეგებნენ.
„ეს არის უბადრუკი შურისძიება უბადრუკი ხალხისგან, რომლებსაც არ უყვართ უკრაინა, მაგრამ ჩვენ ერთად ნამდვილად არ გვეშინია მათი“, - განუცხადა პოროშენკომ მხარდამჭერებს.
საქმე პოროშენკოს მიერ მისი პრეზიდენტობის პერიოდში საგარეო დაზვერვის სამსახურის ხელმძღვანელის მოადგილის შესაძლო უკანონო დანიშვნას ეხება. პოროშენკო აცხადებს, რომ ამჟამინდელი პრეზიდენტის ადმინისტრაციის პირობებში შერჩევითი სამართლის მსხვერპლია.