ნატო კოვიდ 19-ის შესაძლო მეორე ტალღისთვის ემზადება, ჩვენი თავდაცვის მინისტრები ახალ გეგმაზე შეთანხდნენ, - ამის შესახებ ნატო-ს გენერალური მდივანი იენს სტოლტენბერგი სოციალურ ქსელ „ტვიტერში“ წერს.

ნატოს თავდაცვის მინისტრების შეხვედრის შემდეგ გამოქვეყნებულ პოსტში სტოლტენბერგი აღნიშნავს, რომ მინისტრები ახალ ოპერაციულ გეგმაზე, სამედიცინო აღჭურვილობის მარაგებსა და ახალ ფონდზე შეთანხმდნენ.

„ნატო კოვიდ 19-ის შესაძლო მეორე ტალღისთვის ემზადება. ჩვენი თავდაცვის მინისტრები ახალ ოპერაციულ გეგმაზე, სამედიცინო აღჭურვილობის მარაგებსა და კრიტიკული სამედიცინო მარაგების შესაძენად განკუთვნილი ახალი ფონდის შექმნაზე შეთანხმდნენ,“- წერს სტოლტენბერგი.

ცნობისათვის, ნატო-ს ორდღიანი მინისტერიალის შეჯამებისას ნატო-ს გენერალურმა მდივანმა, იენს სტოლტენბერგმა განაცხადა, რომ ალიანსი აქტიურად მუშაობს იმისთვის, რომ კოვიდ-19-ის მეორე ტალღის შემთხვევაში გამოწვევებს უფრო მომზადებული შეხვდეს. მისივე თქმით, პანდემიის პირობებში ნატო-ს მთავარი მიზანი არის უზრუნველყოს, რომ „ჯანდაცვის კრიზისი უსაფრთხოების კრიზისად არ გადაიქცეს.“