ADB-ის საქართველოს მუდმივი წარმომადგენლობის დირექტორი - საქართველოსადმი ნდობამ განაპირობა საერთაშორისო პარტნიორების მხრიდან ფინანსური დახმარების პაკეტების სწრაფი შემუშავება

„ეკონომიკური აქტივობების ეტაპობრივი გახსნის პროცესში საქართველოს უნიკალური საშუალება ეძლევა ეკონომიკური ზრდის ახალი ეტაპის დასაწყებად, რომელიც უფრო მრავალფეროვანი და ინკლუზიური იქნება“ , - ამის შესახებ აზიის განვითარების ბანკის (ADB) საქართველოს მუდმივი წარმომადგენლობის დირექტორი შეინ როზენტალი წერს. ADB-ის წარმომადგენელი აზიის განვითარების ბანკის ოფიციალურ ვებ-გვერდზე გამოქვეყნებულ ბლოგში ხაზს უსვამს, რომ პანდემიის წინააღმდეგ ქვეყნის რეაგირება იყო აღსანიშნავად კარგი და საქართველოს მთელი კავკასიისა და ცენტრალური აზიის რეგიონში ინფიცირების ახალი შემთხვევების ერთ-ერთი ყველაზე დაბალი მაჩვენებელი აქვს.

„მსხვილი რეგიონული სავაჭრო და საერთაშორისო ტურისტული ცენტრის რანგში საქართველო განსაკუთრებით მოწყვლადი გახდა ახალი კორონავირუსისადმი, თუმცა ამის მიუხედავად, ქვეყანამ საოცრად კარგად მოახდინა პანდემიაზე რეაგირება და მთელი კავკასიისა და ცენტრალური აზიის რეგიონში ინფიცირების ახალი შემთხვევების ერთ-ერთი ყველაზე დაბალი მაჩვენებელი აქვს. საქართველოს დაუფასდა გახსნილობისა და ჯეროვანი მმართველობისადმი ნაკისრი მრავალწლიანი ვალდებულება. სხვა ქვეყნებთან შედარებით ვირუსის გავრცელების შეკავებაში მიღწეული წარმატება ადრეული ქმედებებისა და ქმედითი აღსრულების დამსახურებაა. საქართველოში პირველივე შემთხვევების გამოვლენისთანავე დაწესდა სამედიცინო შემოწმება მოგზაურებისთვის, ისევე როგორც გადაადგილების შეზღუდვები. ეროვნულმა ბანკმა სწრაფად შეარბილა რეგულაციები და წარმატებით დაასტაბილურა გაცვლითი კურსი, მაშინ როდესაც კომერციულმა ბანკებმა მსესხებლებს კრედიტების გრაფიკით დაფარვა გადაუვადეს,“ - წერს შეინ როზენტალი.

აზიის განვითარების ბანკის (ADB) საქართველოს მუდმივი წარმომადგენლობის დირექტორი აღნიშნავს, რომ პანდემიაზე რეაგირება მთლიანი შიდა პროდუქტის (მშპ) წილობრივად 8 %-იან ფისკალურ დანაკლისს გამოიწვევს, მაგრამ საქართველოს ფისკალური და სავალუტო ბუფერები აქვს შექმნილი ეკონომიკური შოკების გადასალახად. როგორც როზენტალი წერს ქვეყნის ეკონომიკური პოლიტიკის განმსაზღვრელ უწყებებს კომპეტენციისა და ძლიერი მმართველობის რეპუტაცია გააჩნიათ.

„ადრინდელი გამოწვევებიდან - მათ შორის გლობალური ფინანსური კრიზისიდან და 2008 წელს რუსეთთან დაძაბულობიდან - საქართველომ შეძლო დასკვნების გამოტანა ოჯახების, უმუშევართა და ბიზნესის მხარდაჭერის მნიშვნელობის შესახებ,“ - ნათქვამია ბლოგში.

ADB-ის წარმომადგენელი ასევე წერს, რომ საქართველოსადმი ნდობამ განაპირობა საერთაშორისო პარტნიორების მხრიდან ფინანსური დახმარების პაკეტების სწრაფი შემუშავება, პადემიასთან გამკლავებისა და მასზე რეაგირების მხარდასაჭერად.

„საქართველოსადმი ნდობამ განაპირობა საერთაშორისო პარტნიორების მხრიდან ფინანსური დახმარების პაკეტების სწრაფი შემუშავება, პადემიასთან გამკლავების და მასზე რეაგირების მხარდასაჭერად, რაც მოიცავს 100 მლნ აშშ დოლარის სესხს აზიის განვითარების ბანკისგან. ეს ფინანსური რესურსი მთავრობას პანდემიის შეკავების ყოვლისმომცველი პროგრამის, მოწყვლადი ჯგუფებისთვის საარსებო პირობების უზრუნველყოფისა და კერძო სექტორის მხარდაჭერის დაფინანსებაში დაეხმარება,“- წერს შეინ როზენტალი.

მისივე თქმით, მთავრობა ცდილობს, დაეხმაროს იმ ადამიანებს, ვინც ამას ყველაზე მეტად საჭიროებენ. „მთავრობას სურს, დახმარება იმ ადამიანებამდე მივიდეს, ვინც ამას ყველაზე მეტად საჭიროებენ და კვლევის საფუძველზე ავლენს შესაბამის კატეგორიებს, რომლებსაც როგორც თანხით, ისე ნატურით ეხმარება. საპენსიო სისტემის გამოყენებით, 70 წელს ზემოთ ასაკში მყოფი ადამიანები გაზრდილ პენსიებს მიიღებენ. აზიის განვითარების ბანკი და განვითარებაზე ორიენტირებული სხვა საერთაშორისო პარტნიორები ქვეყნის ხელისუფლებასთან მუშაობენ ამ მექანიზმების გასაძლიერებლად, რათა მოწყვლადი ჯგუფები დაცულნი იყვნენ სამომავლო ეკონომიკური დაღმასვლისას სიღარიბისგან,“- აღნიშნულია ბლოგში.

შეინ როზენტალი, აგრეთვე, წერს, რომ ყოველივე ეს საქართველოს უქმნის ძლიერ პლატფორმას და ახალ შესაძლებლობებს მეტი მედეგობისა და ინკლუზიურობისთვის. ADB-ის საქართველოს მუდმივი წარმომადგენლობის დირექტორი საკუთარ ბლოგში ეკონომიკის ხელახალი ფორმირების ხელშემწყობ ხუთ გზას ასახელებს და აღნიშნავს, რომ ქვეყანამ უკვე გადადგა კონკრეტული ნაბიჯები ამ მიმართულებებით, ეკონომიკის სხვადასხვა დარგის გაძლიერებისა და ხელშეწყობის მიზნით.

აღნიშნულ ინფორმაციას მთავრობის ადმინისტრაცია ავრცელებს.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს