ჩემთვის ძალიან მნიშვნელოვანია ის მხარდაჭერა, რაც განსხვავებული პოლიტიკური ჯგუფებისგან მივიღე და მგონია, რომ სწორედ ამ გზით ნამდვილად შევძლებთ, დავამარცხოთ „ქართული ოცნება”, - ამის შესახებ ჟურნალისტებს „ევროპული საქართველოს” წევრმა, ელენე ხოშტარიამ “ლეიბორისტული პარტიის” ოფისთან განუცხადა, სადაც რამდენიმე წუთში შეხვედრა დაიწყება.

მისი თქმით, ეს ოპოზიციური კოორდინაცია არის იმის წინაპირობა, რომ ისინი „ქართულ ოცნებას" დაამარცხებენ.

„ძალიან მნიშვნელოვანია, რომ ოპოზიციამ ხელისუფლების ბევრი მცდელობის, ბევრი განსხვავების, ბევრი პრობლემის მიუხედავად, შეძლო საერთო სტრატეგიაზე შეთანხმება და ეს საერთო სტრატეგია არის სწორედ სხვადასხვა პარტიის წარმომადგენლების მხარდაჭერა სხვადასხვა მაჟორიტარულ ოლქში. ჩემთვის ძალიან მნიშვნელოვანია ის მხარდაჭერა, რაც განსხვავებული პოლიტიკური ჯგუფებისგან მივიღე და მე მგონია, რომ სწორედ ამ გზით ჩვენ ნამდვილად შევძლებთ, დავამარცხოთ „ქართული ოცნება". რა თქმა უნდა, წინ არის საკონსტიტუციო ცვლილებები, „ქართული ოცნებისგან" არაფერია გამორიცხული, მათ არ შეასრულეს 8 მარტის შეთანხმება, ეს ფაქტია, ნებისმიერ შემთხვევაში ეს ოპოზიციური კოორდინაცია არის იმის წინაპირობა, რომ ჩვენ „ქართულ ოცნებას" დავამარცხებთ.

შეიძლება, რაღაც ჯგუფებს ცოტა განსხვავებული ტაქტიკა ჰქონდეთ, მაგრამ ფაქტია, რომ მთლიანობაში ოპოზიციამ მოახერხა კოორდინაცია. შეიძლება იყოს 1-2 ოპოზიციური ჯგუფი, რომელსაც ცოტა სხვა წარმოდგენა აქვს ტაქტიკაზე, მაგრამ მთლიანობაში ეს შეთანხმება შემდგარია და ეს არის ძალიან მნიშვნელოვანი”, - განაცხადა ხოშტარიამ.

ცნობისთვის, ვაკის მაჟორიტარულ ოლქში ოპოზიციის ნაწილის საერთო კანდიდატი, შესაძლოა, ელენე ხოშტარია იყოს.

იხილეთ ვიდეო