ჩვენმა მთავრობამ ბოდიში რუსეთის პრეზიდენტს კი არ უნდა მოუხადოს, არამედ ჩვენ საზოგადოებას, იმისთვის, რომ გავრილოვი ჩვენი ქვეყნის ტერიტორიაზე შემოუშვეს, - ასე გამოეხმაურა "ევროპული საქართველოს" ერთ-ერთი წევრი, გიორგი კანდელაკი რუსი დეპუტატის, სერგეი გავრილოვის განცხადებას, რომ ის "ბოდიშს არ ელოდება, მაგრამ ფიქრობს, რომ ეს სწორი ნაბიჯი იქნება".
"დარწმუნებული ვარ, ჩვენი საზოგადოება ყურადღებას მიაპყრობს სერგეი გავრილოვის, საქართველოს წინააღმდეგ 1992-93 წლებში ომში მონაწილის სიტყვებს და იმას, რომ გავრილოვი უწონებს, აქებს 20 ივნისის დილის სხდომის ჩაშლის შემდეგ საქართველოს ხელისუფლების ქცევას. ეს ხოტბა და შექება ძალიან მნიშვნელოვანი ილუსტრაციაა იმისა, თუ ვის ინტერესებში შედიოდა და ვის საამებლად გამოიჩინა ივანიშვილის ხელისუფლებამ სისასტიკე 20 ივნისის საღამოს. რა თქმა უნდა, ჩვენმა მთავრობამ ბოდიში რუსეთის პრეზიდენტს კი არ უნდა მოუხადოს, არამედ ჩვენ საზოგადოებას იმისთვის, რომ მიუხედავად გაფრთხილებისა, გავრილოვი მაინც შემოუშვეს ჩვენი ქვეყნის ტერიტორიაზე, 19 ივნისს, პურ-მარილი გაუშალეს, კონცერტი გაუმართეს და 20 ივნისს, რაც მოხდა, ყველამ იცის", - განაცხადა კანდელაკმა.