თქვენ იყავით მთელი ქვეყნის საყრდენი, ჩემი გულწრფელი მადლობა და პატივისცემა თქვენ და ყველა თქვენს კოლეგას მთელს იტალიაში, - ამ სიტყვებით რომის პაპმა ფრანცისკემ ვატიკანში ლომბარდიის რეგიონიდან ჩასულ მედიკოსებს მიმართა.

„თქვენ იყავით მთელი ქვეყნის ერთ-ერთი საყრდენი. მინდა გადმოგცეთ ჩემი გულწრფელი მადლობა და პატივისცემა თქვენ და ყველა თქვენს კოლეგას მთელს იტალიაში,“- განაცხადა რომის პაპმა.

მან მედიკოსებს „ანგელოზები“ უწოდა და მადლობა გადაუხადა იმისთვის, რაც მათ კორონავირუსით დაავადებული პაციენტებისთვის გააკეთეს. პაპმა ხაზი გაუსვა იმ ფაქტს, რომ ხშირად მედიკოსები მომაკვდავ პაციენტებს საკუთარი მობილური ტელეფონებით საშუალებას აძლევდნენ, საყვარელ ადამიანებს გამომშვიდობებოდნენ.

რომის პაპმა განსაკუთრებული პატივისცემით ის მედიკოსები გაიხსენა, რომლებიც კორონავირუსით დაიღუპნენ.

ცნობისათვის, იტალიაში კორონავირუსს 35 000-მდე ადამიანის სიცოცხლე შეეწირა, აქედან 170 ექიმი იყო.