არ უნდა გაგვიკვირდეს ის, რასაც საუბრობს გავრილოვი დღეს, რადგან ზუსტად იგივე გზავნილებით საუბრობს საქართველოს ხელისუფლება და ეს არის რეალური პრობლემა,- ამის შესახებ „ნაციონალური მოძრაობის" წევრმა სალომე სამადაშვილმა ჟურნალისტებთან გავრილოვის განცხადების კომენტირებისას აღნიშნა. დეპუტატის თქმით, გავრილოვმა და 20 ივნისის ღამემ დიდი როლი ითამაშა საზოგადოების გამოფხიზლებაში და მას ამისთვის „მადლობა ეკუთვნის".
„20 ივნისის დღეზე არამხოლოდ საუბრობს იგივე გზავნილებით ხელისუფლება, როცა ოპოზიციას ადანაშაულებს სახელმწიფო გადატრიალების მცდელობაში და უწოდებს მშვიდობიან აქციას შტურმს, არამედ დღემდე პატიმრობაში რჩება გიორგი რურუა, რომელიც იყო ანტისაოკუპაციო მოძრაობის აქტიური მხარდამჭერი. ამიტომ, როცა გავრილოვს ძალიან სანდო მოკავშირე ჰყავს დღევანდელი ხელისუფლების სახით ქვეყანაში, რომელმაც 20 ივნისს მოიწვია ის საქართველოში, საქართველოს პარლამენტში და პარლამენტის სპიკერის სკამში დასაბრძანებლად, რა თქმა უნდა, ის აკეთებს ამ გზავნილებს. მაგრამ ეს ყველაფერი დასრულდება მალე, რადგან გავრილოვი და 20 ივნისის ღამე დაგვეხმარა ერთ რამეში, რომ გამოვფხიზლდეთ როგორც საზოგადოება, დავინახოთ რამხელა საფრთხეს უქმნის ხელისუფლება ჩვენს ევროპულ მომავალს, მომავალს, ევროატლანტიკურ თავისუფალი ქვეყნების სივრცეში. სწორედ ამიტომ დიახ, იგივე გავრილოვს შემდეგი არჩევნების შემდეგ ალბათ ჩვენგან მადლობა ეკუთვნის, რადგან თვალი აუხილა სრულიად საქართველოს საზოგადოებას იმ რეალობაზე, რომელშიც ვცხოვრობთ,"- განაცხადა სამადაშვილმა.
შეგახსენებთ, სერგეი გავრილოვმა 20 ივნისს განცხადება გაავრცელა, სადაც ერთი წლის წინ 20 ივნისს განვითარებულ მოვლენებს იხსენებს და მიიჩნევს, რომ ბოდიშის მოხდა სწორი იქნებოდა.
„ვიმედოვნებთ, რომ საქართველოს ხელისუფლება იპოვის ძალას იმისთვის, რომ რევანშისტების გეგმები საბოლოოდ ჩაშალოს, "-აღნიშნულია განცხადებაში.