მაღალი რისკია იმის, რომ საკონსტიტუციო ცვლილებები ვერ გავიდეს, საერთოდ თუ გრძნობენ რამხელა პასუხისგებლობაა მისი ჩაგდება?! - ამის შესახებ ჟურნალისტებთან დამოუკიდებელმა დეპუტატმა დიმიტრი ცქიტიშვილმა განაცხადა. მისი თქმით, ვერც ხელისუფლება და ვერც მასთან დაპირისპირებული ოპოზიციური ჯგუფები ვერ აცნობიერებენ საკუთარ პასუხისმგებლობას.

"მე პირადად მხარს ვუჭერ ისევე, როგორც პირველ მოსმენაზე დავუჭირე. მე ვერ გავიგე ოპოზიციის პასუხისმგებლობა რაში მდგომარეობს, მათ ხელი მოაწერეს 8 მარტის შეთანხმებას, მე ვფიქრობ, მათი ვალდებულებაც არის მოვიდნენ და მხარი დაუჭირონ ამ შეთანხმების აღსრულებას საკონსტიტუციო ცვლილებების კუთხით. ხელისუფლებაც რისკავს ასევე და რისკის ქვეშ აყენებს პროცესს. ეს არ არის ჯანსაღი და ნორმალური, ჩვენ ვნახეთ, რომ ოპოზიციის ორი ფრაქციის გარდა არის 115 - 116 დეპუტატი, ვინც მხარს უჭერს. მაღალი რისკია იმის, რომ ვერ გავიდეს ცვლილებები, საერთოდ თუ გრძნობენ რამხელა პასუხისგებლობაა მისი ჩაგდება?! მე მგონია, რომ ვერც ხელისუფლება და ვერც მასთან დაპირისპირებული ოპოზიციური ჯგუფები ვერ აცნობიერებენ, რა პასუხისგებლობა გააჩნიათ ქვეყნის წინაშე,"- განაცხადა ცქიტიშვილმა.

შეგახსენებთ, პარლამენტში საარჩევნო სისტემასთან დაკავშირებით საკონსტიტუციო ცვლილებების პაკეტის მეორე მოსმენა მიმდინარეობს.