სხვადასხვა დონორი ორგანიზაცია გვეხმარება, რომ წამლის ხარისხის ლაბორატორია უკვე ქვეყანაში ამოქმედდეს, - ამის შესახებ ჯანდაცვის მინისტრის მოადგილე თამარ გაბუნიამ ჟურნალისტებთან განაცხადა.

როგორც მან აღნიშნა, მსგავსი ლაბორატორიის ამოქმედება 2022 წლისთვის იგეგმება.

„წამლის ხარისხის ლაბორატორიის არსებობა უკვე განსაზღვრულია მთავრობის დადგენილებით, რომელიც შეეხება კარგი სამეწარმეო პრაქტიკის და კარგი სადისტრიბუციო პრაქტიკის დანერგვის საკითხს. 2022 წლამდეა განსაზღვრული ლაბორატორიის შექმნა. დღეს ჩვენ ამ სერვისს ვყიდულობთ, დღესაც არის სახელმწიფო ბიუჯეტში იმის რესურსი, რომ შერჩევითად გადამოწმდეს მედიკამენტის ხარისხი, მაგრამ ეს რა თქმა უნდა, არ არის საკმარისი რუტინული მონიტორინგისთვის წამლის ხარისხზე და ესეც არის ისეთი თემა, რასაც აქვს გარკვეული ძვრები იმ თვალსაზრისით, რომ ჩვენ ვმუშაობთ რესურსის მობილიზებაზე და კონკრეტულ გეგმაზე. სხვადასხვა დონორი ორგანიზაცია გვეხმარება, რომ წამლის ხარისხის ლაბორატორია, უკვე ქვეყანაში ამოქმედდეს,"- განაცხადა გაბუნიამ.

იხილეთ ვიდეო: თამარ გაბუნიას განცხადებით, წამლის ხარისხის ლაბორატორიის შექმნა 2022 წლამდეა განსაზღვრული