ლათინური ამერიკისა და კარიბის ზღვის ქვეყნებში კორონავირუსით გარდაცვლილთა რაოდენობამ 100 000-ს გადააჭარბა. ამ ინფორმაციას ჯონ ჰოპკინსის უნივერსიტეტი ავრცელებს.

მათი თქმით, ბოლო 1 თვის განმავლობაში კორონავირუსი განსაკუთრებით სწრაფი ტემპით ლათინური ამერიკის ქვეყნებში გავრცელდა. ვირუსმა ყველაზე მეტად ბრაზილია და მექსიკა დააზარალა. ბრაზილიაში კორონავირუსის შემთხვევათა რიცხვმა 1 151 000-ს, ხოლო გარდაცვლილთა 52 000-ს გადააჭარბა.

მექსიკაში კორონავირუსით 191 000 პირი დაინფიცირდა, 23 000-ზე მეტი კი დაიღუპა. კორონავირუსის შემთხვევები ასევე მნიშვნელოვნად გაიზარდა პერუსა და ჩილეში. გასულ კვირას გაეროს გენერალურმა მდივანმა ანტონიო გუტერეშმა განაცხადა, რომ კორონავირუსის ეპიდემიის ცენტრმა ევროპიდან ლათინური ამერიკის ქვეყნებში გადაინაცვლა.