ფოტოგრაფი იაკობ ბრეგვაძე, რომელიც ფეხბურთელ გიორგი შაქარაშვილის გარდაცვალების საქმეზე ერთ-ერთი მთავარი მოწმეა, აცხადებს, რომ მცხეთაში, დაბადების დღეზე მომხდარ ჩხუბში შაქარაშვილი არ მონაწილეობდა. აღნიშნულის შესახებ ის „ინტერპრესნიუსისა“ და "პალიტრანიუსის" გადამღებ ჯგუფს ექსკლუზიურად ესაუბრა.

მოწმე ექსკლუზიურ კომენტარში დეტალურად იხსენებს 19 ივნისის ღამით, მეგობრის დაბადების დღეზე განვითარებულ მოვლენებს, თუმცა ამბობს, რომ არაფერი გადაუღია. "არ გადამიღია, ნეტავ, გადამეღო ყველაფერი და დაიხურებოდა საქმე" ,- აცხადებს ფოტოგრაფი.

როგორც მოწმე აღნიშნავს, ჩხუბი დაბადების დღეზე მისი მისვლიდან 15 წუთში დაიწყო.

„ავტოსტოპით წავედი, მივედი სადღაც 11:00 საათზე და 15 წუთში მოხდა ჩხუბი, ოღონდ რატომ და რანაირად, აზრზე არ ვარ, არ ვიცი ვინ ჩხუბობდა. გიორგი არ მონაწილეობდა, გიორგიც შიგნით იყო. ექვსი ბიჭი ვინც ვიყავით, იქიდან 5 მგონი სახლში იყო, ზუსტად არ ვიცი. ეგენიც მერე გავიცანი და მერე ყველა წავედით იმიტომ, რომ იუბილარი შემოვიდა, ნერვები მოეშალა ასეთი რაღაც რომ მოხდა, ტიროდა, ძლივს დავაწყნარეთ და წადითო ყველაო და ყველა რომ წავიდა, ჩვენ მოგვიწია ტაქსით წასვლა. ტაქსი ვერ გამოვიძახეთ, არც ერთი ტაქსი არ მოდიოდა. ბოლოს გავაჩერეთ და ტაქსმა ორ კაცზე მეტს ვერ გაგიყოლებთო. ნეტა, ის ორი მაინც წასულიყო. გიორგი მაინც წასულიყო. არ გაყვნენ ტაქსს და ბოლოს ავტოსტოპზე დავდექით და მოვიდა ეს ორი ტიპი, ვისთანაც ჩვენ არა, მაგრამ ამათ ჩხუბი მოუვიდათ. ეს ორი ტიპი მოვიდა და ნომრები გაცვალეს, რომ დაგირეკავთ, ხვალ შევხვდეთ და ვილაპარაკოთო. ეგონა, რომ ჩვენ ვიჩხუბეთ და მეორე დღეს რომ გაერკვიათ... ყველა როგორ იტყუება? მოვიდნენ, დადგნენ და ჩვენ წამოვედით თბილისისკენ, რომ უფრო ახლოდან გამოგვეძახებინა ტაქსი, მაგრამ ხიდზე რომ გადმოვედით, ეს ორი ბიჭი მორბის და ამ დროს წინ გაგვიჩერა მანქანამ და ამ მანქანიდან გადმოვიდა სავარაუდოდ, ხუთი კაცი, შეიძლება ოთხიც. ზუსტად არ დამინახავს. ერთს რკინის ხელკეტი ეჭირა, მეორემ დიდი ქვა აიღო და წამოვიდა, რომ დაერტყათ, ყველა რომ ვეცემეთ. ამათ ეგონათ, რომ ჩვენ ისინი ვიყავით, ვინც იქ იყვნენ, არადა საერთოდ სხვა "სასტავი" ვიყავით, არაფერ შუაში ვიყავით. ის ერთი ბიჭი საავადმყოფოშია. მოკლედ ყველა გავიქეცით, სამი კაცი გაიქცა ხიდისკენ. ერთი ბიჭი იქვე ბუჩქებში დაიმალა, როგორც მერე გავიგე. მე კამერა ხელში მეჭირა, მანამდე არაფერს ვიღებდი ისეთს, ბლოგებს ვიღებ ზოგადად, მაგრამ მაშინ... ღობეზე გადავხტი და იყო მიტოვებული მშენებარე შენობა, მეორე სართულზე ავედი და რომ ავედი, დავრეკე პოლიციაში.

პოლიციაში რომ დავრეკე, ვუთხარი, რაც მოხდა, როგორც მოხდა და არაგვის ხიდზე მოდით-მეთქი და სადააო. "კაროჩე", როცა მორჩა ყველაფერი, მერე მოვიდნენ და მაგ დროს, ჯერ ერთხელ დავრეკე 112-ში, მერე გადმომირეკეს, მერე ვუთხარი კიდევ იგივე და მოკლედ, ვერ გაიგეს ვერაფერი და ჩამოვდიოდი მაგ დროს, ანუ მანქანა წავიდა მაგ დროს და იყო ორი ბიჭი, ჩვენები და ერთი ნაცემი იყო, ჩავდიოდი რომ მენახა, დავხმარებოდი და უცებ მეორე მანქანა მოვიდა. მეორე მანქანა რომ მოვიდა, იქიდანაც გადმოვიდნენ ბიჭები, თქვენი დედაო, "კაროჩე" ესენი ცემეს. სხვა მანქანა იყო სავარაუდოდ, არ ვიცი. პირველი მანქანა რომ წავიდა, 2 ან 3 წუთში მოვიდა მეორე მანქანა და ესენი ცემეს და რომ დავინახე, მანქანა მოვიდა, ისევ უკან ავბრუნდი, რომ არ დავენახე, იქაც გადასახტომი არ იყო, მეორე სართულზე ვიყავი, ბალახები კი არა, ქვები იყო და მერე "ვაბშე" რომ აღარაფერი ხდებოდა და არავინ იყო გზაზე, მანქანაც არ დადიოდა, პირველი საათი და რაღაც წუთები იყო, ჩავედი, გადავედი პარალელურ მხარეს, ბათუმისკენ მიმავალ მხარეს და მერე ავედი ტყეში და იქაც დავურეკე, რომ აღარაფერი ხდება და შეგიძლიათ გააუქმოთ-მეთქი. იქიდან რომ ჩამოვედი, მერე მოვიდა პოლიცია, მოვუყევი ეს ყველაფერი და მეთქი, "ვსო", მორჩა ყველაფერი და ერთადერთი შეგიძლიათ, რომ თბილისში წამიყვანოთთქო და წამიყვანეს თბილისში“ , - აცხადებს ფოტოგრაფი.

კითხვაზე, რა მიმართულებით გაიქცა გიორგი შაქარაშვილი, ფოტოგრაფი პასუხობს, რომ არ დაუნახავს.

შეგახსენებთ, რომ მყვინთავებმა გიორგი შაქარაშვილის ცხედარი წყალში 22 ივნისს იპოვეს. 19 ივნისს, დაახლოებით 11:00 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა.