ძლიერმა წვიმამ უკრაინაში სამი ადამიანის სიცოცხლე იმსხვერპლა და ასობით ადამიანი იძულებული გახდა სახლები მიეტოვებინა. ხელისუფლების ინფორმაციით, დასავლეთის რეგიონებში გარესამყაროს მოწყვეტილია სოფლები.

უკრაინაში 22 ივნისიდან დაიწყო ძლიერი წვიმები და მას შემდეგ 800-მდე ადამიანის ევაკუაცია განხორციელდა. ყველაზე მეტად დაზარალდა ჩერნოვცისა და ივანო-ფრანკოვსკის რეგიონები.

დაზარალებული რეგიონები მოინახულეს ქვეყნის პრემიერ-მინისტრმა და შინაგან საქმეთა მინისტრმა.

ქვეყნის საგანგებო სიტუაციების სამსახურის ცნობით, წყალდიდობისას დაიტბორა დაახლოებით 187 სოფელი და 5 000-მდე სახლი. ზონაში გაგზავნილია 4 ვერტმფრენი და 150-მდე ჯარისკაცი. მანამდე, უკრაინის საგანგებო სიტუაციების სამსახურის მიერ გავრცელებული ინფორმაციით, ჩერნოვცის მხარეში სტიქიამ ორი კაშხალი დაანგრია, რის გამოც 300-ზე მეტი ადგილობრივის ევაკუაცია გახდა საჭირო.