ვენესუელას დე ფაქტო პრეზიდენტი ნიკოლას მადურო აცხადებს, რომ მზადაა თანამდებობიდან გადადგომის საკითხზე რეფერენდუმი 2022 წელს გამართოს. ამ ინფორმაციას CNN ავრცელებს.
მადუროს თქმით, ის რეფერენდუმზე იმ შემთხვევაში იქნება თანახმა, თუ ამ ინიციატივის მომხრეები საკმარისი რაოდენობის ხელმოწერებს მოაგროვებენ.
„2022 წლის 10 იანვარს შესაძლებელი იქნება ხელმოწერების შეგროვების დაწყება, რათა ჩემი გადადგომის საკითხზე რეფერენდუმი გაიმართოს“, - განაცხადა მადურომ, რომელმაც პრეზიდენტის პოსტი 2019 წლის 10 იანვარს დაიკავა, მისი უფლებამოსილების ვადა კი 2025 წლის 10 იანვარს იწურება.
აღსანიშნავია, რომ ვენესუელას კონსტიტუციის მიხედვით, სახელმწიფო თანამდებობაზე ყოფნისას ვადის ნახევრის გასვლის შემდეგ რეფერენდუმის გამართვა დასაშვები ხდება. შეგახსენებთ, 2019 წლის იანვარში ვენესუელაში საპრეზიდენტო არჩევნები გაიმართა. ოპოზიციის ლიდერმა, ხუან გუაიდომ ნიკოლას მადუროს ბრალი არჩევნების გაყალბებაში დასდო და თავი დროებით პრეზიდენტად გამოაცხადა. მას ლეგიტიმურ პრეზიდენტად მსოფლიოს 50-ზე მეტი ქვეყანა აღიარებს.