მინდა დაგისვათ კითხვა, რომლის დასმაც უმრავლესობის წევრებს უნდათ, მაგრამ ძალიან მორიდებული ხალხია, ერიდებათ და მე დავეხმარები, რატომ არ იცავთ მმართველი გუნდის წევრების უფლებებს, ვერ ხედავთ რა დღეში არიან?-მუდმივად ლანძღავენ, აკრიტიკებენ და არ არსებობს კანონი, რომ აუკრძალოს ხალხს კრიტიკა , - ასე მიმართა „ევროპული საქართველოს“ ერთ-ერთმა ლიდერმა გიგა ბოკერიამ სახალხო დამცველს, ნინო ლომჯარიას, რომელმაც პარლამენტში წლიური ანგარიში წარადგინა.
ბოკერიას განცხადებით, ხელისუფლების წარმომადგენლებს „მუდმივად ლანძღავვენ, აკრიტიკებენ და არ არსებობს კანონი, რომ აუკრძალოს ხალხს ეს კრიტიკა“.
„მე მინდა დაგისვათ ის კითხვა, რომლის დასმაც უნდათ უმრავლესობის წევრებს, მაგრამ ძალიან მორიდებული ხალხია და ერიდებათ პირდაპირ კითხვა და მე დავეხმარები. რატომ არ იცავთ ამ ხალხის უფლებებს, მმართველი გუნდის წევრებს ვგულისხმობ. ვერ ხედავთ, რა დღეში არიან? სულ მუდმივად ლანძღავვენ ამათ, აკრიტიკებენ და არ არსებობს კანონი, რომ აუკრძალოს ხალხს ეს კრიტიკა. ერთი ტელევიზია ხელში ჩავიგდეთ და ციფრული ტექნოლოგიები ისე განვითარდა, 5 გახსნესო. უპასუხეთ, რატომ არ უჭერთ ამ ხალხს მხარს, რომ ამ ქვეყანაში მთავრობის კრიტიკა ერთხელ და სამუდამოდ დამთავრდეს. თქვენ, როგორც სახალხო დამცველი დაეხმარეთ ამ ხალხს, აღარ შეუძლიათ მეტი. ბიძინა ივანიშვილს რატომ არ იცავთ? შეიძლება, კაცს ამხელა ღვაწლი აქვს და არის უპატრონოდ მიგდებული და ვისაც რა უნდა იმას ლაპარაკობს მასზე? თქვენ სახალხო დამცველი ხართ, მართლა აწუხებთ ეს კითხვა და იქნებ გასცეთ პასუხი“,- განაცხადა ბოკერიამ.