შინაგან საქმეთა მინისტრის მოადგილის, ვლადიმერ ბორცვაძის განცხადებით, თუ დადასტურდა, რომ 19 წლისგიორგი შაქარაშვილის საქმეზე დაკავებული ერთ-ერთი პირი სამართალდამცავი ორგანოს მხრიდან ზეწოლას განიცდიდა, ამას შესაბამისი რეაგირება მოყვება.

როგორც ბორცვაძემ აღნიშნა, ეს საკითხი შესწავლას საჭიროებს.

ამასთან, მისივე განცხადებით, თუ დადასტურდა, რომ აღნიშნული ინფორმაცია სიმართლეს არ შეესაბამება, განცხადების ავტორს მოუწევს კითხვებზე პასუხის გაცემა.

„მე როგორც ვიცი ეს განცადება შეიცავს შემდეგ შინაარს, რომ ფიზიკური ძალადობა და ანგარიშსწორება განხორციელდა საგამოძიებო მოქმედების დროს. ეჭვს აჩენს აღნიშნული განცხადება იმ კუთხით, რომ თუ საგამოძიებო მოქმედების მიმდინარეობისას და მას შემდგომ განხორციელდა რაიმე სახის იძულება ან ძალადობა, რატომ არ გაკეთდა მსგავსი განცხადება საგამოძიებო მოქმედებების დასრულების შემდგომ? ეს განცხადება გაკეთდა მას შემდგომ, რაც მოხდა ამ ადამიანის დაკავება. მიუხედავად ამისა, ეს განცხადება შესწავლას საჭიროებს და უნდა მოხდეს ამ ფაქტების და გარემოებების შესწავლა, თუ დადასტურდება რაიმე სახის გადაცდომა ან იძულების ფაქტი სამართალდამცავი ორგანოების მხრიდან, ცალსახად, ამ ქმედებას მიეცემს შესაბამისი შეფასება. იმ შემთხვევაში, თუ მსგავსი ფაქტი არ დადასტურდება, ბუნებრივია, ამ განცხადების ავტორს მოუწევს კითხვებზე პასუხის გაცემა, თუ რა გახდა ამ განცხადების გაკეთების საფუძველი და არის თუ არა ეს ცრუ დასმენა“, - განაცხადა ბორცვაძემ.

ცნობისთვის, გიორგი შაქარაშვილის საქმეზე დაკავებული არასრულწლოვანის ადვოკატის გიორგი გელხაურის განცხადებით, მცხეთის რაიონულ განყოფილებაში მისი დაცვის ქვეშ მყოფის გამოკითხვისას, მასზე განხორციელდა პოლიციელების მხრიდან როგორც ფიზიკურად, ასევე ფსიქოლოგიურად ზეწოლა.