"თიბისისა" და საქართველოს რაგბის კავშირს შორის თანამშრომლობა 4 წლით, 2024 წლის ბოლომდე გახანგრძლივდა.

როგორც „ინტერპრესნიუსს" "თიბისი ბანკიდან" აცნობეს, კრიზისული პერიოდის მიუხედავად "თიბისის" და საქართველოს რაგბის კავშირის პარტნიორობა გრძელდება და "თიბისი" საქართველოს რაგბის კავშირის, რაგბის ეროვნული ნაკრების, საქართველოს რაგბის ყველა ასაკობრივი ეროვნული ნაკრების გენერალურ სპონსორად რჩება.

„თიბისი, როგორც ლიდერი ბანკი წარმატებით აგრძელებს გუნდურ სპორტში ლიდერი სახეობის - რაგბის - მხარდაჭერას. ჩვენ უკვე გვაქვს 4 წლიანი მეგობრობის ისტორია და გვინდა, რომ ის კიდევ უფრო მასშტაბურად გაგრძელდეს. ჩვენი თანამშრომლობის მიზანი საზოგადოებაში სარაგბო ღირებულებების გაძლიერება და მთლიანად რაგბის, როგორც სპორტის სახეობის როგორც ქვეყნის შიგნით, ისე მის ფარგლებს გარეთ პოპულარიზაციაა,“ - განაცხადა "თიბისი ბანკის" გენერალური დირექტორის მოადგილემ ნიკა ქურდიანმა.

ამასთან, როგორც რაგბის კავსირის პრეზიდენტი გოჩა სვანიძე ამბობს, გრძელდება საქართველოს რაგბის კავშირის პოლიტიკა რაგბიში ბიზნესის აქტიური ჩართვის მიმართულებით.

"თიბისი ბანკთან" განვლილმა ოთხწლიანმა ურთიერთობამ, რომელიც არა მხოლოდ ფინანსური დახმარების კუთხით იყო საინტერესო, არამედ სარაგბო ღირებულებების, ფასეულობის პოპულარიზაციას ემსახურებოდა, ნათლად დაგვანახა აღებული კურსის სისწორე. განსაკუთრებით აღსანიშნავია ის ფაქტი, რომ, ყველა პრობლემატური საკითხის მოგვარებაში "თიბისი ბანკი" ჩვენს გვერდით იყო და რჩება როგორც ერთგული მეგობარი და თანამოაზრე. გვიხარია, რომ ერთად ვქმნით ისტორიას,“ - აღნიშნა მან. გოჩა

"თიბისისა" და საქართველოს რაგბის კავშირს შორის აქტიური თანამშრომლობა 2016 წელს დაიწყო. როგორც ბანკში აცხადებენ, ამ წლების განმავლობაში ბორჯღალოსნებმა არაერთი დასამახსოვრებელი მატჩი და ტურნირი გამართეს.

"4 წლის განმავლობაში "თიბისის" მიერ დაგეგმილი მრავალფეროვანი მარკეტინგული აქტივობების დახმარებით რაგბი იქცა ქვეყნის წამყვან სპორტულ სახეობად, საგრძნობლად გაიზარდა მისი გულშემატკივრების რაოდენობა, რასაც როგორც ადგილობრივი ისე საერთაშორისო ტურნირების ფარგლებში გამართულ თამაშებზე სავსე სტადიონები და გულშემატკივრების აქტიური ჩართულობა მოწმობს. მნიშვნელოვანია, რომ ეს ინტერესი ყოველდღიურად სულ უფრო იზრდება.

თანამშრომლობის ახალი ეტაპზე არაერთი საინტერესო პროექტი იგეგმება, რომელიც რაგბის კიდევ უფრო მასშტაბურ პოპულარიზაციას შეუწყობს ხელს,"- ნათქვამია ინფორმაციაში.