„ნაციონალური მოძრაობის" თავმჯდომარე გრიგოლ ვაშაძე გორში მომხდარ ინციდენტს ეხმაურება. მისი განცხადებით, შიდა ქართლში მათი ოფისი მეოთხედ დაარბიეს, რაც "ქართული ოცნების" ხელწერაა და იმის მომასწავებელია, როგორ აპირებს ხელისუფლება არჩევნების ჩატარებას.

„ხელისუფლების მიერ წახალისებულმა და მათ მიერ მოგზავნილმა პირებმა მეოთხედ დაარბიეს შიდა ქართლის ოფისი. დანით შეიარაღებული პირი, მას შემდეგ, რაც დალეწა ოფისი, ემუქრებოდა იქ მისულ ადამიანებს. პირველ სამ შემთხვევაში ხელისუფლებას ინტერესი არ გამოუჩენია და არ დაუსჯია დამნაშავე. ეს არის „ქართული ოცნების" ხელწერა და იმის მომასწავებელი, როგორ აპირებენ არჩევნების ჩატარებას. ეს ინციდენტი და სხვა მსგავსი ინციდენტები არის ზიზღის კამპანიის, შემადგენელი ნაწილი, რომელსაც ეწევა „ქართული ოცნება". ეს ისტერიული ქმედებები ნათლად აჩვენებს და სამედიცინო დიაგნოზია იმის, რომ ხელისუფლება მარცხისთვის არის განწირული,"- განაცხადა გრიგოლ ვაშაძემ.

შეგახსენებთ, რომ გორში „ერთიანი ნაციონალური მოძრაობის“ ოფისის შენობის და ოფისში არსებული ნივთების დაზიანების ფაქტზე პოლიციამ სხვისი ნივთის დაზიანების ბრალდებით ერთი პირი დაკავა.