ირანის უზენაესი ლიდერი აიათოლა ალი ხამენეი აცხადებს, რომ ქვეყნის ეკონომიკური პრობლემები კიდევ უფრო გაუარესდება, თუკი კორონავირუსის გავრცელების შეჩერება არ მოხდება. “გულგრილობისა და დაავადების მნიშვნელოვნად გავრცელების შემთხვევაში, ეკონომიკური პრობლემებიც მოიმატებს,“- აღნიშნა ირანის უზენაესმა ლიდერმა.
მისივე თქმით, ის მუხტი, რაც დაავადებასთან ბრძოლაში ქვეყანაში თავდაპირველად არსებობდა, გაქრა.
„რაღაც უნდა გაკეთდეს კორონავირუსით გამოწვეული პრობლემების პრევენციისთვის. თავდაპირველი იმპულსი, რომელიც ვირუსის შესაჩერებლად არსებობდა, ზოგიერთ ადამიანსა და ხელისუფლების წარმომადგენელში გაქრა,“- განაცხადა აიათოლა ალი ხამენეიმ.
ცნობისათვის, ბოლო 24 საათში ირანში კორონავირუსის 2 456 შემთხვევა გამოვლინდა და ინფიცირებულთა საერთო რაოდენობამ 220 180-ს მიაღწია. გარდა ამისა, კოვიდ 19-ს კიდევ 125 ადამიანის სიცოცხლე შეეწირა და ფატალური შემთხვევების რიცხვმა 10 364-ს მიაღწია.