საქართველოს პარლამენტი უფრო წარმომადგენლობითი და პლურალისტული იქნება და მეტ ადამიანს ექნება საშუალება საქართველოს მომავლის შენებაში შეიტანოს წვლილი, - ამის შესახებ საქართველოში დიდი ბრიტანეთის ელჩმა, ჯასტინ მაქქენზი სმიტმა სოციალურ ქსელში დაწერა, რითაც საქართველოს პარლამენტის მიერ საკონსტიტუციო ცვლილებების მიღებას გამოეხმაურა.
მისი განცხადებით, ქართველი ხალხის ნება ურყევია.
"დღეს ისტორიული დღეა. კონსტიტუციური ცვლილებები დემოკრატიის გაძლიერებისკენ გადადგმული ნაბიჯია. საქართველოს პარლამენტი უფრო წარმომადგენლობითი და პლურალისტული იქნება და მეტ ადამიანს ექნება საშუალება საქართველოს მომავლის შენებაში შეიტანოს წვლილი. ვულოცავ საქართველოს ხალხს, მათი ნება ურყევია",- წერს ჯასტინ მაქქენზი სმიტი "ტვიტერზე".
ცნობისთვის, პარლამენტმა საკონსტიტუციო ცლილებები მესამე მოსმენით დაამტკიცა, რომლის თანახმად 2020 წლის საპარლამენტო არჩევნები 120/30-ზე პროპორციით ჩატარდება. კონსტიტუციურ კანონპროექტს მხარი 117-მა დეპუტატმა დაუჭირა.