ევროპის საბჭოს გენერალური მდივნი და ევროპის საბჭოს საპარლამენტო ასამბლეის პრეზიდენტი  საქართველოს ორგანიზაციის ეფექტური თავმჯდომარეობისთვის მადლობას უხდიან

საქართველოს თავმჯდომარეობის დასრულების შემდეგ, ევროპის საბჭოს გენერალურმა მდივანმა, მარია პეიჩინოვიჩ ბურიჩმა და ევროპის საბჭოს საპარლამენტო ასამბლეის პრეზიდენტმა, რიკ დაემსმა საგარეო საქმეთა მინისტრს, დავით ზალკალიანს, ევროპის საბჭოს მინისტრთა კომიტეტში საქართველოს თავმჯდომარეობასთან დაკავშირებით წერილი გამოუგზავნეს. ინფორმაციას საქართველოს საგარეო საქმეთა სამინისტრო ავრცელებს.

უწყების ცნობით, ევროპის საბჭოს გენერალური მდივნის წერილში აღნიშნულია, რომ საქართველოს თავმჯდომარეობა უპრეცედენტო გამოწვევას, კოვიდ–19 პანდემიას დაემთხვა, თუმცა საქართველომ მოახერხა სიტუაციასთან ადაპტირება, გამოძებნა კრეატიული და ეფექტური გზები პრიორიტეტების წარმატებით განსახორციელებლად.

„დიდად ვაფასებ იმ მეთოდებს, რისი საშუალებითაც საქართველოს ხელისუფლებამ მოახერხა სიტუაციასთან ადაპტირება, გამოძებნა კრეატიული და ეფექტური გზები პრიორიტეტების წარმატებით განსახორციელებლად. თქვენი პრიორიტეტები, რომლებიც ევროპის საბჭოს მანდატთან სრულ შესაბამისობაში იყო, ამავდროულად გაბედული და ამბიციური გახლდათ და ადამიანის უფლებებისა და გარემოს დაცვის სფეროში სიახლე დაამკვიდრა”-ნათქვამია გენერალური მდივნის წერილში.

გენერალური მდივანი ასევე ხაზს უსვამს იმ ფაქტს, რომ საქართველოს მიერ შერჩეული პრიორიტეტები სოლიდური და ამბიციური იყო და ამასთანავე, საქართველომ, თავმჯდომარეობისას ადამიანის უფლებებისა და გარემოს დაცვის სფეროში სიახლე დაამკვიდრა. მარია პეიჩინოვიჩ ბურიჩი მადლიერებას გამოხატავს საქართველოს ხელისუფლებისა და საგარეო საქმეთა მინისტრის მიმართ, საქართველოს მნიშვნელოვანი პროგრესისთვის.

ევროპის საბჭოს საპარლამენტო ასამბლეის პრეზიდენტი უაღრესად დადებითად აფასებს საქართველოს თავმჯდომარეობის მიღწევებს და მადლიერებას გამოხატავს თავმჯდომარეობის ექვსთვიან პერიოდში არსებული თანამშრომლობისა და აზრთა გულწრფელი ურთიერთგაცვლისთვის.

„თქვენ უნდა იამაყოთ 6 თვის განმავლობაში თქვენი მიღწევებით, ასევე იმით, თუ როგორ გაართვით თავი თავმჯდომარეობას კოვიდ–19–ის პერიოდში, რამაც უკიდურესად რთულ პირობებში მინისტრთა კომიტეტის ეფექტური მუშაობა უზრუნველყო“, - წერს რიკ დაემსი ევროპის საბჭოს საპარლამენტო ასამბლეის პრეზიდენტი.

რიკ დაემსი ასევე დადებითად აფასებს, პანდემიის დროს მკაცრი კარანტინის მიუხედავად, საქართველოს თავმჯდომარეობის მიერ მინისტრთა კომიტეტის, საპარლამენტო ასამბლეის და გენერალური მდივნის ე.წ. სამმხრივი დიალოგის ხელშეწყობის მიზნით გაწეულ სამუშაოს.

საპარლამენტო ასამბლეის პრეზიდენტი აღნიშნავს, რომ მნიშვნელოვანია საქართველოს თავმჯდომარეობის ერთ-ერთი პრიორიტეტის, ადამიანის უფლებებსა და გარემოს დაცვას შორის არსებული ურთიერთკავშირის ხელშეწყობა, რაც წარმოადგენს საქართველოს თავმჯდომარეობის უაღრესად მნიშვნელოვან მემკვიდრეობას. ამ კონტექსტში, რიკ დაემსი მიესალმა საქართველოს, საბერძნეთის და გერმანიის თავმჯდომარეობების ერთობლივ დეკლარაციას, რაც უზრუნველყოფს აღნიშნული საკითხის მომდევნო თავმჯდომარეობების დღის წესრიგში გათვალისწინებას და ხელს შეუწყობს ამ სფეროში ევროპის საბჭოს ინსტრუმენტების პოტენციალის სრულად ათვისებას.

დასასრულს, თანამშრომლობისათვის, საპარლამენტო ასამბლეის პრეზიდენტი მადლიერებას გამოხატავს მინისტრისა და ელჩი გივიაშვილის მიმართ.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს