ეკონომიკისა და მდგრადი განვითარების მინისტრის ნათია თურნავას განცხადებით, საქართველო უსაფრთხოების კრიტერიუმს სრულად აკმაყოფილებს იმისთვის, რომ ევროკავშირის უსაფრთხო ქვეყნების სიაში მოხვდეს. თურნავას თქმით, ამ სიაში ყველაზე მნიშვნელოვანია, ქვეყანა ეპიდემიოლოგიურად იყოს უსაფრთხო.

„ჩვენ ვმუშაობთ ევროკავშირთან ერთად, რომ საბოლოო სიაში, რომელიც ოფიციალურად გამოქვეყნდება და იქნება ყველა წევრთან შეთანხმებული, ჩვენ აუცილებლად ვიყოთ. ყველა კრიტერიუმით ჩვენ ვართ უსაფრთხო ქვეყანა. ეს არის პირველი და განმსაზღვრელი ამ სიაში მოხვედრის, როდესაც შენ ეპიდემიოლოგიურად ხარ უსაფრთხო, კარგად მართული და საიმედო ქვეყანა. აქედან გამომდინარე, ძალიან დადებითი მოლოდინი გვაქვს, რომ უახლოეს პერიოდში ეს სია გახდება ცნობილი. ვაგრძელებთ ევროკავშირთან მუშაობას იმ პროცედურებზე, რასაც ალბათ შემოიღებს ან თანდართული იქნება ამ სიასთან ერთად, თუმცა მთავარია, რომ ჩვენ ამ სიაში უნდა ვიყოთ“, - განაცხადა თურნავამ.