ჩვენ ვაპირებთ, რომ ხვალ და ზეგ დაჩქარებული წესით მივიღოთ საარჩევნო კოდექსში შესატანი ცვლილებები და ჩვენ, ვითვალისწინებთ ეუთო/ოდირის რეკომენდაციების პრაქტიკულად უდიდეს უმრავლესობას , - ამის შესახებ უმრავლესობის ლიდერმა მამუკა მდინარაძემ მმართველი პარტიის ოფისში უმრავლესობის სხდომის დასრულების შემდეგ განაცხადა.

მდინარაძის თქმით, საკონსტიტუციო ცვლილებებთან ერთად ეუთო/ოდირის რეკომენდაციების გათვალისწინება ნიშნავს იმას, რომ ქვეყანაში გაიზრდება დემოკრატიის ხარისხი და ნაკლები ადგილი დარჩება სპეკულაციებისთვის.

„დღევანდელი შეხვედრა ეძღვნებოდა, ამ პოზიტიური პროცესის გაგრძელებას და ჩვენ ვაპირებთ, რომ ხვალ და ზეგ დაჩქარებული წესით მივიღოთ საარჩევნო კოდექსში შესატანი ცვლილებები და ჩვენ, რაც მთავარია ვითვალისწინებთ ეუთო/ ოდირის რეკომენდაციების პრაქტიკულად უდიდეს უმრავლესობას. საკონსტიტუციო ცვლილებებთან ერთად ეუთო/ოდირის რეკომენდაციების გათვალისწინება და მათი ასახვა შესაბამის ნორმებში ნიშნავს იმას, რომ კიდევ უფრო გაიზრდება დემოკრატიის ხარისხი, კიდევ უფრო ნაკლები კითხვის ნიშანი იქნება და კიდევ უფრო ნაკლები სივრცე დარჩება სპეკულაციებისთვის, რაც არჩევნებს შეეხება იმიტომ, რომ ჩვენი მთავარი მიზანია ჩავატაროთ არჩევნები ისე, რომ ეს კითხვის ნიშნები იყოს, რაც შეიძლება, ნაკლები“, - განაცხადა მდინარაძემ.

ცნობისთვის, „ქართული ოცნების“ ოფისში უმრავლესობის სხდომა, რომელზეც საარჩევნო კანონმდებლობაში შესატანი ცვლილებები განიხილეს, 20:00 საათზე დაიწყო. სხდომას არ ესწრებოდა პარტიის თავმჯდომარე ბიძინა ივანიშვილი.