სს „ვანრიკ აგროს“ აქტივები გაიყიდა - „საპარტნიორო ფონდი“ ლურჯი მოცვის პროექტს ახალ ინვესტორთან ერთად განაგრძობს

სს „ვანრიკ აგროს“ აქტივები აღსრულების ეროვნული ბიუროს მიერ გამოცხადებულ საჯარო აუქციონზე 2020 წლის 29 ივნისს გაიყიდა. ამის შესახებ „ინტერპრესნიუსს“ „საპარტნიორო ფონდიდან“ აცნობეს.

მათივე ინფორმაციით, აუქციონის სასტარტო ფასი 4 570 302 ლარს შეადგენდა. საჯარო აუქციონზე გამართული ვაჭრობის შედეგად, გამარჯვება ქართულმა კომპანია შპს „ეფკომ“ მოიპოვა და მძაფრი კონკურენციის პირობებში, 85 ბიჯის შემდეგ, სს „ვანრიკ აგროს“ აქტივები 12 339 817 ლარად შეიძინა.

„აღსანიშნავია, რომ სს „ვანრიკ აგროს“ მიმართ, მისი დირექტორის მიმართვის საფუძველზე, 2019 წლის მარტში დაიწყო გაკოტრების საქმისწარმოება, რამაც სს „ვანრიკ აგროს“ მისცა შესაძლებლობა, ამ წარმოების პერიოდში აუქციონით გადაეცა აქტივები სარგებლობაში შპს „ეფკოსთვის“. ამის შედეგად, ლურჯი მოცვის ნარგავები განადგურებას გადაურჩა და მოსავლის აღებაც მოხერხდა. მნიშვნელოვანია, რომ „ვანრიკ აგროში“ შექმნილი მძიმე მდგომარეობის მიუხედავად, „საპარტნიორო ფონდის“ მიერ დაგეგმილმა და ინვესტორისთვის საჯაროდ აუქციონზე შეთავაზებულმა ფინანსურმა სტრუქტურამ შესაძლებლობა მისცა ფონდს, მაქსიმალურად დაებრუნებინა საკუთარი ინვესტიცია, დაეფინანსებინა ახალი პროექტი და შესაბამისად, ხელი შეუწყო დამატებითი ინვესტიციის მოზიდვასა და სამუშაო ადგილების შექმნას,“ - ნათქვამია ინფორმაციაში.

შპს „ეფკო“ კომპანიაში დამატებითი ინვესტიციების განხორციელებასა და ლურჯი მოცვის პლანტაციის 280 ჰექტარზე გაფართოებას გეგმავს, რაც ადგილობრივი მოსახლეობისთვის დასაქმების რეალური შესაძლებლობა გახდება. რაც შეეხება „საპარტნიორო ფონდის“ ინვესტიციას, მისი დაბრუნება 7 წლის განმავლობაში განხორციელდება.

შეგახსნებთ, სს „ვანრიკ აგრო“ 2015 წელს დაარსდა და მის მთავარ საქმიანობას ლურჯი მოცვის მოყვანა, გადამუშავება და რეალიზაცია წარმოადგენდა. კომპანიის მფლობელობაში იყო ოზურგეთის მუნიციპალიტეტის დაბა ლაითურში მდებარე მიწის ნაკვეთი ნაწილობრივ განაშენიანებული ლურჯი მოცვის პლანტაციითა და გადამამუშავებელი საწარმოო ხაზით.

ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
ქართული პრესის მიმოხილვა 22.01.2021
არჩილ მორჩილაძე - ბიუჯეტის ხარჯზე მედიკამენტების ხარჯების ანაზღაურებას სახელმწიფოს მიერ დასაქმებული ადამიანები და მათი ოჯახის წევრები, 250 000-ზე მეტი ადამიანი იღებს, როცა უამრავი სოციალურად დაუცველი ამ დაფარვის მიღმაა დარჩენილი
რა გეგმები აქვს ქუთაისის საერთაშორისო უნივერსიტეტს და რა პროგრამებს სთავაზობს სტუდენტებს? - ინტერვიუ უნივერსიტეტის კანცლერ მაგდა მაღრაძესთან
სილქფესტი მომხმარებლებს უქმეებზე ულიმიტო ინტერნეტ და უსასრულო სასაუბრო პაკეტების გააქტიურებას სთავაზობს
დეველოპერული კომპანია „ბლოქსი“ ქალაქ ზუგდიდში მულტიფუნქციური სავაჭრო ცენტრის მშენებლობას იწყებს
ევროკავშირის და FAO-ს მხარდაჭერით ქართველი ფერმერები შემოსავლებს და წარმოებას ზრდიან