უკეთესი იქნებოდა, სრული კონსენსუსი ყოფილიყო და დაგვერეგულირებინა საკითხი, რომ სიძულვილის ენის გამოყენება მაქსიმალურად შეზღუდულიყო, თუმცა სამწუხაროდ, კონსენსუსის არარასებობის გამო დავტოვეთ ეს საკითხი რეგულირების მიღმა, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა არჩევნების დემოკრატიულ გამართვასთან დაკავშირებულ შეხვედრაზე განაცხადა.

მისივე თქმით, ოპოზიციისა და არასამთავრობო ორგანიზაციების წარმომადგენლები სიძულვილის ენის შესახებ რეგულაციების კანონპროექტში ასახვას გამოხატვის თავისუფლების შესაძლო შეზღუდვის კონტექსტში განიხილავდნენ.

„სიძულვილის ენის გამოყენების საკითხი საქართველოშიც გამოწვევაა. საარჩევნო-სარეფორმო ჯგუფის ფარგლებშიც არის დისკუსია, ხომ არ შევთანხმებულიყავით, რომ ჩაგვეწერა კანონში რეგულაცია, რომელიც მაქსიმალურად შეზღუდავდა სიძულვილის ენის გამოყენებას. ეს იყო ასევე ეუთო/ოდირის შემოთავაზებულ რეკომედაციებშიც, თუმცა, სამწუხაროდ, ვერ შევთანხმდით, რადგან ოპოზიციის წარმომადგენლების და არასამთავრობო ორგანიზაციების მხრიდან დაფიქსირდა პოზიცია, რომ ეს შეიძლება აღქმულიყო გამოხატვის შეზღუდვის კონტექსტში. ჩვენ ამ პოზიციას არ ვიზიარებდით, მაგრამ ვინაიდან კითხვის ნიშნები შეიძლება გაჩენილიყო და მაშინ, როცა ჩვენთვის პრინციპულად მნიშვნელოვანია, რომ არჩევნები ჩატარდეს მაქსიმალურად გამჭვირვალედ, ფუნდამენტური უფლებების დაცვით, ჩვენ აღარ შევიტანეთ ეს რეგულაცია ცვლილებებში. უკეთესი იქნებოდა, რომ სრული კონსენსუსი ყოფილიყო და დაგვერეგულირებინა საკითხი, რომ სიძულვილის ენის გამოყენება მაქსიმალურად უნდა შეზღუდულიყო, თუმცა სამწუხაროდ, კონსენსუსის არარასებობის გამო დავტოვეთ ეს საკითხი რეგულირების მიღმა. იმედი მაქვ,ს პოლიტიკური პარტიები შევთანხმდებით იმაზე, რომ მაქსიმალურად დაიცალოს საარჩევნო პროცესი, წინასაარჩევნო გარემო სიძულვილით მოტივირებული განცხადებებისგან. ასევე, შესაძლებელია ჩვენ შევთავაზოთ პოლიტიკურ პარტიებს, რომ ეს იყოს შეთანხმება პარტიებს შორის და ასეთი ენის გამოყენება არ მოხდეს,“ - განაცხადა ოხანაშვილმა.