„საერთაშორისო გამჭვირვალობა - საქართველოს" დაწყებული აქვს საარჩევნო კამპანია,- ამის შესახებ პარლამენტის ყოფილმა თავმჯდომარემ, ირაკლი კობახიძემ ჟურნალისტებთან „ქართული ოცნების" დეპუტატ ვიქტორ ჯაფარიძესთან დაკავშირებით ორგანიზაციის კვლევის კომენტირებისას აღნიშნა.
კობახიძე დარწმუნებულია, რომ აღნიშნული კვლევა „ქართული ოცნების" წინააღმდეგ მიმართული „ფეიკ- კამპანიის" ნაწილია.
„საერთაშორისო გამჭვირვალობა - საქართველოს" დაწყებული აქვს საარჩევნო კამპანია. ამის ნიშნები პირდაპირ იკვეთება და ინტენსიურია საკმაოდ ეს კამპანია მთელი ამ პერიოდის განმავლობაში. კონკრეტული ინფორმაციის შესახებ მე არ ვიცი, თუმცა, ხედავთ, რომ არის ინტენსიური „ფეიკ -კამპანია „ქართული ოცნების" წინააღმდეგ. ეს კამპანია არის გაშლილი და სხვადასხვა სუბიექტია მასში ჩართული. ჩვენ ძალიან ხშირად ვავლენთ ხოლმე მათი მხრიდან გავრცელებულ „ფეიკ ნიუსს“. აქაც 99- პროცენტიანი ალბათობით დარწმუნებული ვარ, რომ ესეც იქნება „ფეიკ- ნიუსი," - განაცხადა კობახიძემ.
ცნობისათვის, „საერთაშორისო გამჭვირვალობა - საქართველოს" ინფორმაციით, დეპუტატ ვიქტორ ჯაფარიძესთან დაკავშირებულმა კომპანიებმა შესყიდვებიდან 6 მილიონ ლარზე მეტი მიიღეს. ორგანიზაცია სუს-ს და პროკურატურას მოუწოდებს, დეპუტატისა და მის შვილთან დაკავშირებული კომპანიების ტენდერები შეისწავლონ.