ირაკლი კობახიძე - ბობოხიძესა და დავით ჭაკუას შორის განსხვავება არ არის - ბობოხიძე, ბოკერია, სააკაშვილი, თვითონ იყვნენ დამკვეთები იმ უბედურების, რასაც აკეთებდა ჭაკუა

კაკო ბობოხიძესა და დავით ჭაკუას შორის განსხვავება არ არის, კაკო ბობოხიძე, გიგა ბოკერია, მიხეილ სააკაშვილი, თვითონ იყვნენ პასუხისმგებელი და დამკვეთები იმ უბედურების, რასაც აკეთებდა ჭაკუა , - ამის შესახებ “ქართული ოცნების“ აღმასრულებელმა მდივანმა, ირაკლი კობახიძემ გერმანიიდან სასჯელაღსრულების დეპარტამენტის ყოფილი თავმჯდომარის დავით ჭაკუას ექსტრადირების საკითხთან დაკავშირებით განაცხადა.

როგორც კობახიძემ „პალიტრანიუსის“ გადაცემა „360 გრადუსში“ განაცხადა, დამკვეთებიც დაისჯებიან. მისივე თქმით, ახალაია სასჯელს იხდის, ადეიშვილი კი ძებნაშია.

„ჭაკუა არის მათი სახე. აი, კაკო ბობოხიძესა და ჭაკუას შორის განსხვავება არ არის, ეს არის "ნაცმოძრაობის" სახე - წამება, ადამიანის ღირსების ხელყოფა, "ფეიკნიუსიც" ამის გაგრძელებაა. უსირცხვილო კაცია[ბობოხიძე], თვითონ იყო პასუხისმგებელი, კაკო ბობოხიძე, გიგა ბოკერია, მიხეილ სააკაშვილი, თვითონ იყვნენ პასუხისმგებელი და დამკვეთები იმ უბედურების, რასაც აკეთებდა ჭაკუა. ჭაკუა იყო ამ ყველაფრის შემსრულებელი. დამკვეთი იყო კაკო ბობოხიძე, სააკაშვილი, ბოკერია და ა.შ.. სირცხვილია, კაკო ბობოხიძე რომ გამოდის და კრავივით ლაპარაკობს იმაზე, რომ თითქოს რაღაც პრობლემა იყო... მას პოლიტიკური პასუხისმგებლობა ეკისრება იმაზე, რომ ის პოლიტიკური რეჟიმი შექმნეს და ეს რეჟიმი შექმნეს ზუსტად სააკაშვილმა, ბოკერიამ, ბობოხიძემ, გიგლა ბერბიჭაშვილებმა. დამკვეთები გაქცეულები არიან, ახალაია ზის, ადეიშვილი გაქცეულია. ადეიშვილს შეფარდებული აქვს სსკ-ს დანაშაული და ის არის ძებნილი”, - განაცხადა კობახიძემ.

ცნობისთვის, გერმანიიდან სასჯელაღსრულების დეპარტამენტის ყოფილი თავმჯდომარის, დავით ჭაკუას ექსტრადიცია განხორციელდა.

პროკურატურის ცნობით, საქართველოს გენერალური პროკურატურის შუამდგომლობა დ.ჭ.-ს ექსტრადირების თაობაზე დაკმაყოფილდა და გერმანიის სასამართლომ საქართველოს პროკურატურის მიმართვის საფუძველზე მიიღო გადაწყვეტილება მისი საქართველოში ექსტრადირების თაობაზე. შესაბამისად, საქართველოს იუსტიციის სამინისტროს სპეციალური პენიტენციური სამსახურის თანამშრომლების მიერ, დღეს საღამოს, გერმანიის ფედერაციული რესპუბლიკიდან საქართველოში ეტაპირებულ იქნა სასჯელაღსრულების დეპარტამენტის ყოფილი თავმჯდომარე დ.ჭ., რომელიც საქართველოს გენერალური პროკურატურის მიერ იძებნებოდა არაერთი მძიმე და განსაკუთრებით მძიმე დანაშაულის ჩადენისთვის.

"კერძოდ: პატიმართა მიმართ დამამძიმებელ გარემოებებში ჩადენილი დამამცირებელი და არაადამიანური მოპყრობისთვის, იგივე დანაშაულების წაქეზებისთვის, დამამძიმებელ გარემოებებში ჩადენილი სამსახურებრივი უფლებამოსილების ბოროტად გამოყენებისთვის, სისხლის სამართლის საქმეზე მტკიცებულების ფალსიფიკაციის, დანაშაულთა პროვოკაციის წაქეზებისთვის და მოწმეზე ზემოქმედების განხორციელებისთვის. აღსანიშნავია, რომ ხსენებული დანაშაულები დაკავშირებულია ე.წ. 2006 წლის ,,ციხის ბუნტისა“ და 2012 წლის ,,ციხის კადრების“ საქმეებთან. ამასთან, პირველ შემთხვევაში, დ.ჭ.-ს დაუსწრებლად მისჯილი აქვს 3 წლისა და 9 თვის ვადით თავისუფლების აღკვეთა, ჯარიმა და ასევე ჩამორთმეული აქვს სახელმწიფო სამსახურში დანიშვნითი თანამდებობის დაკავების უფლება. რაც შეეხება ე.წ. ,,ციხის კადრების“ საქმეს, იგი ამ ეტაპზე სასამართლო განხილვის სტადიაზეა და საქართველოს პროკურატურას აქვს მოლოდინი, რომ მოცემულ საქმეზეც დადგება გამამტყუნებელი განაჩენი",- ნათქვამია პროკურატურის ინფორმაციაში.

იგორ ტიშკევიჩი - უახლოესი 3-4 წელი მოსკოვის აგრესიული პოლიტიკის გამო პოსტსაბჭოთა ქვეყნებისთვის მშვიდობიანი ვერ იქნება
ქართული პრესის მიმოხილვა 07.08.2020
გიორგი პერტაია - სავაჭრო პალატა მეწარმეებს ბიზნესის მხარდამჭერ ყველა პროგრამას ერთ ონლაინ პლატფორმაზე სთავაზობს
ახალი Galaxy Note 20 და Note 20 Ultra წინასწარი შეკვეთა დაიწყო
ბარათიდან თანხის განაღდების ახალი სერვისი ლიბერთის მომხმარებლისთვის „ნიკორა სუპერმარკეტის“ ქსელში