19 წლის გარდაცვლილი ფეხბურთელის, გიორგი შაქარაშვილის ბიძის, მირიან ნიკოლაძის განცხადებით, ის პარტია „ჩვენი საქართველო - სოლიდარობის ალიანსის“ ერთ-ერთი თანადამფუძნებელი და პოლიტსაბჭოს წევრია. როგორც ნიკოლაძემ განმარტა, მისი პოლიტიკური ასპარეზი გიორგი შაქარაშვილის გარდაცვალებამდე დიდი ხნით ადრე დაიწყო და მომავალშიც გაგრძელდება.

„მე ვარ პარტია „ჩვენი საქართველო - სოლიდარობის ალიანსის“ ერთ-ერთი თანადამფუძნებელი და პოლიტსაბჭოს წევრი. ეს ყველაფერი ჯერ კიდევ ამ ტრაგედიამდე დიდი ხნით ადრე იყო და ბუნებრივია, ეს რეჟიმი გრძელდება მიუხედავად ჩემი პირადი ოჯახური დიდი პრობლემებისა, რომელიც უკავშირდება გიორგის გარდაცვალებას. მე ყოველთვის აქტიური ვიყავი, როგორც მოქალაქე, ძალიან ხშირად მიწევდა პოლიტიკურ თემებში მეტ-ნაკლები აქტიურობით მონაწილეობა და ეს გაგრძელდება კვლავაც“, - განაცხადა ნიკოლაძემ.

შეგახსენებთ, რომ პარტია „ჩვენი საქართველო – სოლიდარობის ალიანსი“ დეპუტატებმა - მარიამ ჯაშმა, გედევან ფოფხაძემ, ლევან გოგიჩაიშვილმა და ბექა ნაცვლიშვილმა დააფუძნეს, დღეს კი თბილისში ცენტრალური ოფისი გახსნეს.