სახალხო დამცველი ნინო ლომჯარია არ გამორიცხავს, თხოვნით მიმართოს პროკურატურას იმისათვის, რომ ფეხბურთელ გიორგი შაქარაშვილის გარდაცვალების საქმის მასალებს გამოძიების რეჟიმში გაეცნოს.
როგორც მან ჟურნალისტებს განუცხადა, შაქარაშვილის გარდაცვალების საქმესთან დაკავშირებით საზოგადოებას ძალიან ბევრი კითხვის ნიშანი აქვს.
„ჟურნალისტებიც აქტიურად აშუქებენ იმ შეკითხვებს, რაც საქმის გარშემო არსებობს. თუმცა, სახალხო დამცველი ალბათ, უახლოეს დღეებში დაასრულებს შეხვედრებს და ბრალდებულების მონახულებას. შაქარაშვილის ოჯახის წევრებთანაც გვექნება კომუნიკაცია. ამის შემდგომ უკვე ჩვენ მივიღებთ გადაწყვეტილებას, უკვე რა ფორმით გავაგრძელებთ ამ საქმეში ჩართულობას. არ გამოვრიცხავთ, რომ პროკურატურას მივმართოთ თხოვნით, გაგვაცნოს საქმის მასალები და მიმდინარე რეჟიმში გავეცნოთ გამოძიების საქმის მასალებს. თუმცა, პირველ რიგში, უნდა ვესაუბრო ოჯახის წევრებს და მათგან მივიღო ინფორმაცია იმ შეკითხვების შესახებ, რაც მათ აქვთ და რის გამოც მათ შეიძლება უნდოდეთ სახალხო დამცველის ჩართულობა ამ პროცესში“, - განაცხადა ნინო ლომჯარიამ.