ევროპარლამენტი მაღალ შეფასებას აძლევს პოლიტიკური პარტიების მიერ 8 მარტის ურთიერთგაგების მემორანდუმისა და ერთობლივი განცხადების ხელმოწერის ფაქტს და მხარეებს შეთანხმების ყველა ასპექტის შესრულებისკენ მოუწოდებს, - ამის შესახებ საქართველოსა და ევროკავშირს შორის ასოცირების შეთანხმების განხორციელების შესახებ ანგარიშშია აღნიშნული, რომელიც ევროპარლამენტის საგარეო საქმეთა კომიტეტმა პირველი კენჭისყრით მიიღო.

„ევროპარლამენტი მიესალმება პარტიათა შორის დიალოგის შედეგს, როგორც საერთო გამოსავლის პოვნის სურვილის ნათელ ნიშანს და ხაზს უსვამს პოლიტიკურ პარტიებს შორის ნდობის აღდგენისა და დიალოგის გაგრძელების აუცილებლობას, როგორც პოლიტიკური სტაბილურობის საფუძველს 2020 წლის საპარლამენტო არჩევნების წინ,“ - აღნიშნულია დოკუმენტში.

გარდა ამისა, ევროპარლამენტი მიესალმება საქართველოს პრეზიდენტის მიერ გიგი უგულავასა და ირაკლი ოქრუაშვილის გათავისუფლების ფაქტს და მას 8 მარტის შეთანხმების სრულად განხორციელების კუთხით წინგადადგმულ ნაბიჯად მიიჩნევს.

„[ევროპარლამენტი] მიესალმება პრეზიდენტ ზურაბიშვილის 15 მაისის გადაწყვეტილებას ოპოზიციის ორი დაპატიმრებული ლიდერის გათავისუფლების შესახებ, როგორც მნიშვნელოვან წინგადადგმულ ნაბიჯს დაძაბულობის შესამსუბუქებლად და 8 მარტის შეთანხმების განსახორციელებლად და მოუწოდებს მხარეებს, პატივი სცენ ამ შეთანხმებას და მისი ყველა ასპექტი სრულად განახორციელონ. უზრუნველყონ, რომ საარჩევნო რეფორმის ყველა ელემენტი კონსტიტუციასა და კანონში რაც შეიძლება მალე იქნას გადატანილი და განხორციელებული,“ - აღნიშნულია დოკუმენტში.

შეგახსენებთ, ევროპარლამენტის საგარეო ურთიერთობათა კომიტეტზე საქართველოსა და ევროკავშირს შორის ასოცირების შეთანხმების განხორციელების შესახებ ანგარიშში შესატან ცვლილებებს პირველი მოსმენით კენჭი უყარეს.